Tíðindi: Hoyringssvar Ι 20. august 2018
Uppskot til løgtingslóg um matstovu- og gistingarhúsvirksemi (matstovulógin) til hoyringar

 

Uppskot til løgtingslóg um matstovu- og gistingarhúsvirksemi (matstovulógin)

 

Sent Vinnuhúsinum til hoyringar. Hoyringsfreistin er sett til mánadagin 20. august 2018.

 

 

Svar frá Ferðavinnufelagnum

 

Hoyringssvar til uppskot til ll. um matstovulóg­­­­­­­­­­­­­­­­­­­­­­­­­­­­­­­­­­­­­­­­­­­­­­

 

Víst verður til teldubræv frá Uttanríkis- og vinnumálaráðnum sent okkum hin 28. juni, har lógaruppskot um matstovu- og gistingarhúsvirksemi verður sent Ferðavinnufelagnum til hoyringar.
 

Felagið tekur undir við, at umsóknarmannagongdin verður gjørd meira einføld og nútíðarhóskandi og skilur endamálið við, at tað nú verður Loyvisnevndin, ið útskrivar loyvini og ikki politiið. Hinvegin heldur felagið ikki, at tað er rætt at fremja broytingar í hissiniloyvunum, soleiðis sum tað stendur í uppskotinum.


Skipanin við hissiniloyvunum, sum var innførd í 2006, hevur virkað væl, og felagið heldur, at hildið eigur at verða fram eftir hesum leisti, sum var lagdur fyri dagin í 2006, og sum vinnan hevur lagað seg til, virkað eftir og gjørt íløgur eftir síðani. Førleikar og umstøður eru ment, soleiðis at skeinkingin fer fram á skipaðan og ábyrgdarfullan hátt.


Skipanin við hissiniloyvum var sett í verk fyri at skapa skipað viðurskifti til tiltøk, har hildið var sær til gamans. Heldur loyvishavarin ikki treytirnar fyri skeinking, kann hann missa skeinkiloyvið. Loyvishavarin hevur tí eina serliga áeggjan at halda reglur og treytir. Við hesi broyting í hissiniloyvunum, sum er í uppskotinum, verður tað torført at revsa brot á treytir og reglur, tí ikki er nógv at missa hjá einum, sum ikki hevur skeinkiloyvi.


Hildið eigur tí at verða fast í núverandi reglugerð, har loyvishavarar standa fyri hissiniloyvinum. Tað verður ikki hildið at verða skilagott at lata áhugafólk standa fyri skeinking og tí ábyrgd og teim reglum og treytum, ið har fylgja við. Tað hevði verið eitt afturstig, tá ið tað snýr seg um trygd, dálking og týdningin av skipaðum viðurskiftum á tílíkum tiltøkum. At sterkt rúsdrekka ikki verður skonkt, hjálpir ikki um støðuna. Hetta er longu galdandi á uttandura tiltøkum.


Mælt verður til, at myndugleikarnir heldur gera tað meira smidligt at gerast loyvishavari, soleiðis at fleiri kunnu fáa skeinkiloyvi. Tað er hetta lógaruppskot uttan iva ein liður í, nú umsitingarliga byrðan skal gerast lættari hjá umsøkjarum. Í mun til kostnaðin verður mælt til, at gjøldini fyri skeinkiloyvini verða skerd, soleiðis at kostnaðurin ikki verður ov tungur at bera hjá teim mongu nýggju í vinnuni.

 

Harafturat eigur landið at tryggja seg ímóti misnýtslu av skeinkiloyvum, og har eigur landið ikki at lata sær lynda í mun til treytirnar, ið verða settar, við at slaka í krøvunum til hissiniloyvini. Landið hevur sett eitt høgt góðskustøði, tá ið tað snýr seg um skipað viðurskifti til tiltøk, sum ikki hava skeinkiloyvi. Spurningur kann setast við, hví skeinkiloyvir skulu krevjast av teimum, sum virka í yrkinum, tá ið tey, sum ikki eru í vinnuni, kunnu fáa hissini skeinkiloyvi uttan stórvegis hóvasták. Tað er vert at hava í huga, at vinnan hevur innrættað seg eftir galdandi reglugerð og ment førleikar og umstøður til tess.

 

 

 

Nú broyting verður framd í halgidagslógini skal felagið gera vart við, at tað eru aðrar ásetingar í halgidagslógini og politiviðtøkunum, sum ikki eru nútíðarhóskandi, og sum eiga at verða broyttar. Eitt nú skeinkingarviðurskifti halgidagar og afturlatingartíðir hjá vistastøðum. Felagið mælir til at hugt verður at hesum viðurskiftum eisini, nú talan er um eina matstovulóg, sum hevur sum endamál at gera reglurnar um matstovu- og skeinkingarvirksemi einfaldari og meira tíðarhóskandi. Skotið verður upp at seta eina tilgongd í verk, har umboð fyri vinnuna kunnu koma við sínum íkasti til, hvussu hetta verður framt best í verki.

 

Í hesum sambandi skal nevnast, at Ferðavinnufelagið fegnast um, at tað í ískoytinum til frágreiðing løgmans á ólavsøku verður nevnd ítøkilig ætlan um at broyta rúsdrekkalógina, soleiðis at innkeypið hjá matstovum av øl og víni kann fara fram á handilsligum grundarlagi. Tað er stórur tørvur á at fáa hesa broyting framda, sum felagið eisini áður hevur víst á.

 

Ferðavinnufelagið er altíð til reiðar at umrøða øll hesi viðurskifti við Uttanríkis- og vinnumálaráðið.

Fleiri tíðindi í hesum bólki
Fleiri tíðindi