Tíðindi: Hoyringssvar Ι 06. apríl 2021
Lógaruppskot um stuðul til ferðavinnufyritøkur fyri fastar útreiðslur í sambandi við COVID-19 til hoyringar

Lógaruppskot um stuðul til ferðavinnufyritøkur fyri fastar útreiðslur í sambandi við COVID-19 til hoyringar

 

Svar frá Ferðavinnufelagnum

Ferðavinnufelagið takkar fyri møguleikan at ummæla uppskot til ll. um stuðul til ferðavinnufyritøkur fyri fastar útreiðslur í sambandi við COVID-19.

 

Ferðavinnufelagið hevur síðani hjálparpakki 3 fór úr gildi víst á tørvin á hjálparpakka 4 fyri ferðavinnuna.

 

Felagið fegnast tí um, at uppskotið um hjálparpakka 4 er greitt úr hondum og klárt at bera løgtinginum.

 

Felagið hevur tó nakrar ítøkiligar viðmerkingar til uppskotið:

 

Av tí at talan er um eitt longri stuðulstíðarskeið enn í hjálparpakka 3, eigur ikki at vera hildið fast í 10 mió kr. sum hægsta stuðulsupphædd. Hægsta stuðulsupphædd eigur í hjálparpakka 4 at vera 14 mió kr., sum er samsvarandi einum átta mánaðar tíðarskeiði.

 

Harafturat heldur felagið tað ikki vera rímiligt, at stuðulin, sum ávísar fyritøkur hava fingið í vetur vegna afturlating av teirra virksemi, skal mótróknast í hjálparpakka 4. Hetta er ikki rímiligt, tí tann stuðulin var veittur, tí myndugleikarnir stongdu fyri virkseminum hjá hesum fyritøkum.

 

Hjálparpakki 3 tók ikki atlit til stóru kapasitetsøkingina í gistingarhúsvinnuni í 2020. Hesum verður í ein ávísan mun lagt upp fyri í grein 5 í hjálparpakka 4. Kapasitetsøkingin í 2020 fevndi um tvey nýggj gistingarhús og eina stóra útbygging av einum verandi gistingarhúsi. Annað gistingarhúsið er sum kunnugt ikki fevnt av hjálpakka 3 og 4.

 

Grein 5, stk. 3 leggur upp fyri eini kapasitetsøking, um talan er um eitt nýtt gistingarhús á einari aðrari adressu enn verandi gistingarhús. Broytingin fevnir hinvegin ikki um eina útbygging av einum núverandi gistingarhúsi á somu adressu. Ferðavinnufelagið mælir til, at ein tílík kapasitetsøking eisini verður fevnd av grein 5, soleiðis at allir partar vera settir líka.

 

Útrokningargrundarlagið í mun til kapasitetsøkingina verður ikki nærri útgreinað í lógaruppskotinum, men felagið væntar at verða hoyrt, tá ið nærri ásetingar verða settar um hetta í kunngerð.

 

Ein onnur broyting í uppskotinum er, at uppgerðin skal áteknast av góðkendum grannskoðara, um stuðulsupphæddin er omanfyri 120.000 kr. Ferðavinnufelagið mælir í hesum sambandi til, at útreiðslur til grannskoðara í sambandi við umsókn til hjálparpakka 4 og harumframt til grandskoðaraváttanina verða endurrindaðar, um umsóknin verður gingin á møti.

 

Annars tekur Ferðavinnufelagið undir við uppskotinum og gleðist um, at hjálp nú er á veg til føstu útreiðslurnar hjá sperdu ferðavinnufyritøkunum.

 

Ummælisfreistin var nakað stutt og væntast má, at tað er møguligt, at fleiri viðmerkingar koma eftir at freistin er farin.

 

Fleiri tíðindi
Fleiri tíðindi