Endamálið við sáttmálanum er at geva brúkaranum og fyritøkuni/handverkaranum høvi til at gjøgnumganga arbeiðsuppgávuna fyri síðan at gera eina skrivliga avtalu. Ein gjøgnumgongd av arbeiðsuppgávunum, saman við tí skrivligu avtaluni, er við til at betra um møguleikarnar fyri at arbeiðsgongdin og tað endaliga úrslitið verða nøktandi fyri báðar partar.

Brúkaraavtalan eigur tískil at verða tikin í brúk, tá arbeiðsuppgávan verður útgreinað, so at øll viðurskifti, sum viðvíkja tí veiting, ið sambært avtaluni skal útvegast, verða gjøgnumgingin og avtalað. Hetta er m.a., hvussu skal tað endaliga úrslitið síggja út, hvussu góðskan á tilfarinum skal vera, umframt hvussu og nær arbeiðið skal gerast.

 

Tá talan er um størri og/ella kompliseraðar arbeiðstøkur, verður rátt til, at brúkarin ráðførir seg við serkønan ráðgeva, tá arbeiðsuppgávan skal útgreinast. Eisini verður rátt til, at brúkarin saman við sínum ráðgeva tekur støðu til, um arbeiðið skal gerast við støði í ABF 06. Dømi um tílík arbeiði kunnu vera stórar um- ella uppíbyggingar ella sethúsabygging.

 

Avtalan kann takast niður her.