Netverkið er opið fyri øllum fyritøkum, sum annaðhvørt eru beinleiðis limir í Føroya Arbeiðsgevarafelag ella sum eru limir umvegis eitt annað arbeiðsgevarafelag. Serskild skipan kann verða gjørd fyri fyritøkur, sum ikki kunnu gerast partur av Føroya Arbeiðsgevarafelagi.

Varandi Vinna er eitt netverk, sum hevur til endamáls at skapa góðar umstøður fyri burðardyggari framleiðslu og tænastuveiting í Føroyum.

Málið er at savna fyritøkur í einum netverki, sum hevur fokus á at finna ítøkiligar loysnir til burðardygga menning – bæði í egnum virksemi og í samfelagnum sum heild. 

Føroyskar fyritøkur hava í stóran mun somu avbjóðingarnar á burðardygdarøkinum, og tí gevur tað góða meining at samstarva og fáa vent evninum í einum føroyskum høpi.

Ja, allar fyritøkur eru vælkomnar at gerast partur av netverkinum. Tá ið nýggir limir koma til, arbeiða vit altíð við at fáa teir væl inn í viðurskiftini; millum annað við eyka innleiðandi fundum.

Fyri at geva nýggjum limum, sum eru í holt við at fóta sær á økinum, bestu møguleikar at koma væl í gongd, hevur Varandi Vinna eina royndartíð upp á tvey ár. Tað vil siga innlimingarárið og eitt eftirfylgjandi roknskaparár.

Hetta merkir, at fyritøkur, sum gerast limir, hava tvey ára royndartíð, áðrenn krøvini um útlát og frágreiðing gerast galdandi. Hevur fyritøkan ikki givið frágreiðing út ella sett sær mál um at minka útlátið triðja árið, ber ikki til at halda fram sum limur.

Fýra netverksfundir eru um árið, har viðkomandi evni verða umrødd. Til hesar fundir er møtiskylda. Fyritøkur kunnu senda tvey til fýra umboð at luttaka, og krav er, at eitt av umboðunum er úr ovastu leiðsluni.

Eftir tørvi verða eyka arbeiðsfundir ella skeið løgd til rættis í árinum. Til hesi er ikki møtiskylda.

Ársfundur er í juni, har ársfrásøgn við úrslitum frá árinum verður løgd fram. Á fundinum verður nýtt stýri valt, limagjaldið ásett og virkisgrundarlagið verður eftirmett.

Limafyritøkurnar binda seg til at raðfesta burðardygd í egnum virksemi og at luttaka á netverksfundum og í tí felags arbeiði,  sum netverkið setir í verk.

Fyri at tryggja framgongd skulu limafyritøkurnar seta sær mál. Málini skulu endurspegla, at limafyritøkurnar vilja minka útlátið, og harumframt binda tær seg til árliga at gera eina almenna frágreiðing um burðardygd.

Eitt stýri verður valt fyri netverkið at sita í tvey ár. Helvtin av stýrinum verður skift út á hvørjum ári fyri at tryggja støðugt framhald í arbeiðinum. Stýrið er mannað við seks leiðsluumboðum frá luttakandi fyritøkunum umframt einum umboði fyri Vinnuhús ið. Umboðini verða vald á ársfundinum, og miðað verður eftir einari javnari umboðan, bæði í mun til vinnugreinar og landafrøðiliga spjaðing. Stýrið skipar seg sjálvt við 
einum forfólki og einum varaforfólki.

Í stýrinum sita:

• Gunnar Nielsen, Effo
• Ingunn Eiriksdóttir, Betri Trygging
• Jenny A. í Heiðunum, Hotel Djurhuus
• Jón H. Atlason, Hiddenfjord
• Niels Winther, Vinnuhúsið
• Sunnvard Andreasen, Articon
• Ulla Joensen, Elektron

Stýrið setir kósina fyri netverkið komandi árið. Harumframt ásetir stýrið, hvørji mál og avbjóðingar netverkið skal raðfesta við tí endamáli at styrkja og menna burðardyggar karmar í Føroyum.