Netverkið er opið fyri øllum fyritøkum, sum annaðhvørt eru beinleiðis limir í Føroya Arbeiðsgevarafelag ella sum eru limir umvegis eitt annað arbeiðsgevarafelag. Serskild skipan kann verða gjørd fyri fyritøkur, sum ikki kunnu gerast partur av Føroya Arbeiðsgevarafelagi.

Varandi Vinna er eitt netverk, sum hevur til endamáls at skapa góðar umstøður fyri burðardyggari framleiðslu í Føroyum.

Málið er, at savna føroyskar fyritøkur í einum netverki, sum hevur fokus á, at finna ítøkiligar loysnir til burðardygga menning – bæði í egnum virksemi og í samfelagnum sum heild. 

Føroyskar fyritøkur hava í stóran mun somu avbjóðingarnar á burðardygdarøkinum, og tí gevur tað góða meining at samstarva og fáa vent evninum í einum føroyskum høpi.

Tað er stórur munur á, hvussu langt fyritøkur eru komnar á burðardygdarøkinum. Tí verður netverkið skipa í tveimum:

• Varandi Vinna Innleiðsla, sum er til fyritøkur, ið eru í holt við at fóta sær á økinum
• Varandi Vinna, sum er ætlað fyritøkum, ið arbeiða miðvíst við burðardygd

Fyritøkur, sum eru nýggjar á økinum ella sum ikki eru klárar at seta sær bindandi mál í burðardygd gerast partur av Varandi Vinnu Innleiðslu.

Innleiðslunetverkið er til fyritøkur, sum ikki eru klárar at seta sær bindandi mál innan burðardygd. Einasta kravið er, at fyritøkurnar raðfesta burðardygd í egnum virksemi. Endamálið læring og kunning, soleiðis at fyritøkurnar í framtíðini kunnu flyta seg yvir í Varandi Vinnu.

Tær fyritøkur, ið gerast partur av Varandi Vinnu skulu seta sær felags krøv:

• Seta sær bindandi mál um at minka útlát í vav 1 og 2 í tráð við París-sáttmálan
• Arbeiða við útláti í vav 3 og seta bindandi mál
• Gera árliga almenna frágreiðing um burðardygd (ESG-lyklatøl)
• Ovasta leiðsla skal luttaka á netverkfundum

Tað eru fýra netverksfundir árliga. Á netverksfundunum eru upplegg frá fyritøkum uttanífrá og innanhýsis framløgur, har fyritøkurnar greiða frá gongdini og aktuellum avbjóðingum. Endamálið er at styrkja fyritøkurnar við íblástri og førleikum, sum kunnu nýtast í teirra egna burðardygdararbeiði.

Netverksfundirnir eru 2-4 tímar.

Til netverksfundirnar hjá Varandi Vinnu Innleiðslu kunnu 2-4 fólk fyri hvørja fyritøku luttaka. Fyritøkur avgera sjálvar, hvørji starvsfólk luttaka (t.d. ESG-starvsfólk, bókhald, HR, osfr)

Til netverksfundirnar hjá Varandi Vinnu kunnu 2-4 fólk fyri hvørja fyritøku luttaka. Tað er krav, at eitt umboð er ovasta leiðsla - t.d. stjóri, fíggjarleiðari og nevndarforfólk.

Í Varandi Vinnu Innleiðslu er heimarbeiðið millum netverksfundirnar avmarkað. Men tær fyritøkur, sum hava ambitiónir um at flyta seg til Varandi Vinnu, mugu sjálvandi raðfesta burðardygd eitt sindur hægri og tað krevur nakað av arbeiði.

Fyritøkur í Varandi Vinnu hava játtað seg til nøkur felags krøv, og tískil krevur hetta eisini nakað eyka av fyritøkuni.

Virksemið í netverkunum tekur altíð støði í aktuellum avbjóðingum hjá luttakandi fyritøkum. Alt eftir, hvør tørvurin er, kann annað virksemi verða sett á skránna - t.d. arbeiðsfundir og verkætlanir, samstarv við netverk í okkara grannalondum og samskifti við myndugleikar í mun til at betra karmar at reka burðardygga vinnu.

Í stýrinum sita umboð fyri Varandi vinnu og Varandi Vinnu Innleiðslu og eitt umboð fyri Vinnuhúsið. Í stýrinum fyri 2025/2026 sita sjey umboð:

• Anna Kalsø (J&K Petersen Contractors), ið er forkvinna
• Bjartur Vestergaard Hjaltalin (Búsetur)
• Ingunn Eiriksdóttir (Betri Trygging)
• Jón H. Atlason (Hiddenfjord)
• Mouritz Mohr (MEST)
• Ulla Joensen (Elektron)
• Niels Winther (Vinnuhúsið)

Stýrið stingur út í kortið tey evni, ið Varandi Vinna og Varandi Vinna Innleiðsla arbeiða við komandi árið. Hesi taka støði í avbjóðingum hjá luttakandi fyritøkum og teimum krøvum, ið eru á økinum.

Stýrið lýsir, hvør týdningarmiklasti boðskapurin hjá netverkinum er, og hvussu til ber at ávirka politisku skipanina fyri at fáa betri umstøður til burðardygd.