Dagført av Vinnuhúsinum tann 23. oktobert 2020

Avbyrging, sóttarhald ella heimauppihald

Hetta eru trý ymisk hugtøk, sum tú skalt fyrihalda teg til.

Avbyrging: 

Tú hevur fingið staðfest coronavirus, og tá skalt tú vera avbyrgd/ur frá øðrum, so tú ikki smittar onnur.

Ber ikki til at avbyrgja teg heima við hús, kanst tú fara aðrastaðni, t.d. í summarhús. Ber tað ikki til, kann Heilsumálaráðið hjálpa tær at finna eitt stað at vera, sum oftast í gistingarhús.

Sóttarhald:        

Tú hevur verið í beinleiðis sambandi við ein persón, sum hevur fingið staðfest corona.

Tá skalt tú í sóttarhald, og verður avbyrgd/ur frá øðrum í 10 dagar.

Tú skal vera serliga varug/ur við sjúkueyðkenni, ið kunnu benda á, at tú hevur fingið coronavirus, t.e. fepur o.a. Hevur tú sjúkueyðkenni, skalt tú ringja til kommunulækna ella læknavaktina.

Hava myndugleikarnir heitt á teg um at fara í sóttarhald, verður mælt til, at tú eisini letur teg kanna á 6. degi. Ein negativ kanning á 6. degi loysir teg tó ikki úr sóttarhaldinum.

Heimauppihald:

Tá tú kemur til Føroya úr útlandinum skalt tú lata teg kanna á á flogvøllinum við komu til landið ella á bryggjuni áðrenn fráferð (við skipi). Síðani skalt tú vera í heimauppihaldi, til tú hevur fingið negativt svar frá kanningini. Myndugleikarnir mæla staðiliga til, at tú eisini kannar teg 6. dagin eftir komu. Harumframt mæla myndugleikarnir til serligt varsemi í 14 dagar eftir komu, um tú ert komin úr einum landi við høgum smittutrýsti (t.e. meira enn 50 fyri hvørji 100.000 íbúgvar. 

Føroyskir útisiglarar og føroyingar, sum arbeiða ella mynstra í einum karantenulandi við høgum smittutrýsti, skulu lata seg kanna á flogvøllinum við komu til landið ella á bryggjuni við fráferð, og skulu síðani beinleiðis í heimauppihald tá tey koma til Føroya. Tey skulu verða verandi í heimauppihaldi til tey hava fingið negativt úrslit av seinnu kanningini, sum skal takast 6. dagin eftir heimkomu.

Tú finnur upplýsingar um innferð úr ymiskum londum til Danska kongsríkið her: https://coronasmitte.dk/en/entry-into-denmark/is-my-country-open-or-banned

 

  Kelda: www.corona.fo

  • Starvsfólk hava ikki rætt til løn, um tey fara í sjálvboðið sóttarhald
  • Skilt verður ímillum tvungið, tilmælt og sjálvboðið sóttarhald ella heimauppihald
  • Set teg í samband við landslæknan ella ring á 304040, um tú hevur illgruna um smittu
Kann arbeiðsgevari krevja, at fólk arbeiða heimanífrá, meðan fólk eru í sóttarhaldi ella heimauppihaldi?

Um til ber at arbeiða heimanífrá, skulu fólk gera tað.

Arbeiðsgevarin fær ikki afturrindað lønarútreiðslur til persón, sum hevur rætt til løn undir sjúku, um til ber at røkja arbeiðið heimanífrá.

Hvussu við løn, um starvsfólk fær Covid-19?

Um starvsfólk eru smittað við COVID-19, eru tey sjúk, og tey hava tá rætt til løn undir sjúku sambært sáttmála ella sjúkradagpening sambært dagpeningalógini.

Eitt av átøkunum í hjálparpakkanum er, at ein afturrindanarskipan verður gjørd fyri privatar arbeiðsgevarar, sum gjalda løn undir sjúku. Arbeiðgevarar fáa afturgoldið lønarútreiðsluna, tó í mesta lagi við eini upphædd, sum svarar til sjúkradagpening.

corona.fo