Dagført av Vinnuhúsinum tann 1. mai 2020

EKF: Gjaldføri og endurtrygging av útflutningsfyritøkum

Tvær nýggjar skipanir hjá EKF Danmarks Eksportkredit skulu hjálpa COVID19-raktum útflutningsfyritøkum.

 

Veðhald fyri gjaldførislán til lítlar og miðalstórar útflutningsfyritøkur

EKF veðheldur fyri gjaldførislánum til COVID19-raktar útflutningsfyritøkur. Hetta ger tað lættari hjá útflutningsfyritøkum, sum hava avbjóðingar við gjaldførinum, at fáa lán frá einum fíggingarstovni. EKF veðheldur fyri 80% av einum møguligum tapi, sum ein fíggingarstovnur fær av at veita gjaldførislán til eina lítla ella miðalstóra útflutningsfyritøku, og fyri 70% til stórar fyritøkur.

 

Víðkan av endurtryggingarskipan EKFs

EKF hevur eina endurtryggingarskipan, har privat tryggingarfeløg, sum kreditttryggja útflutningin hjá útflutningsfyritøkum, kunnu endurtryggja seg. Fyri at tryggja, at útflutningsfyritøkur framhaldandi hava somu atgongd til at kredittryggja útflutningin, verður arbeitt við at víðka endurtryggingarskipanina hjá EKF til eisini at fevna um OECD-lond.

Les meira um skipanirnar á heimasíðuni hjá EKF, www.ekf.dk/coronavirus

 

 

Nær er talan um eina lítla ella miðalstóra fyritøku?

Vegleiðandi er talan er um eina lítla ella miðalstóra fyritøku um:

  • Fyritøkan hevur undir 250 starvsfólk (ársverk) og
  • Fyritøkan antin hevur eina sølu, sum í mesta lagi er 50 mió evrur ella hevur eina fíggjarstøðu (balansu) sum í mesta lagi er 43 mió evrur.
Hvørji eru krøvini annars fyri at fáa veðhald fyri gjaldførisláni?

Í høvuðsheitum eru krøvini fyri at kunna fáa veðhald fyri gjaldførislán hesi:

Fyritøkan skal hava mist ella vera í vanda fyri at missa í minsta lagi 30 % av søluni orsakað av COVID-19.
Sølan frá útflutningi skal vera í minsta lagi 10% av samlaðu søluni hjá fyritøkuni. Sum útflutningur verður eisini roknað søla til aðrar útflutningsfyritøkur og til útlendsk ferðafólk.
Fyritøkan skal vera kredittverdug
Virksemið hjá fyritøkuni skal verða umhvørvisliga og sosialt burðardygt.

Les meira á www.ekf.dk um ítøkiligu krøvini.

Hvar skal eg venda mær um veðhald frá EKF?

Tú skalt venda tær til tín banka um tú ert áhugað/ur í skipanunum hjá EKF.

EKF