Dagført av Vinnuhúsinum tann 11. august 2020

Útlendsk arbeiðsmegi

Arbeiðsgevarar mugu framvegis átaka sær eina víðkaða skyldu at syrgja fyri, at útlendsk starvsfólk fáa greiða kunning um støðuna og almennu tilmælini fyri atburð í sambandi við coronavirus COVID-19.

Eisini má arbeiðsgevarin tryggja sær, at útlendsku starvsfólkini skilja tilmælini frá myndugleikunum.

Um so er, at starvsfólk av útlendskum uppruna mugu í sóttarhald, má arbeiðsgevarin tryggja, at hesi hava nøktandi liviumstøður.

Á heimasíðuni www.corona.fo er kunning, sum tit kunnu brúka. Kunningin er eisini á enskum máli.

Atgongdin til landið er avmarkað og skilt verður millum loyvd lond og karantenulond.Tað ber tó til at ferðast úr einum karantenulandi til Føroya í arbeiðsørindum. Henda heimild verður givin teimum sum hava arbeiðsloyvi og hava eitt viðurkenningarvert starv ella viðurkenningarverda arbeiðsuppgávu at røkja, sum skal loysast á einum arbeiðsplássi í Føroyum. Tá ið komið verður til Føroya úr einum karantenulandi er neyðugt at fara í sóttarhald. Til ber at fara í arbeiðandi sóttarhald, um tað er møguligt. Øll ferðandi skulu gjøgnum passeftirlit í Vága Floghavn og eisini í Kastrup. Arbeiðsfólk skulu veita prógv fyri, at tey hava arbeiðsørindi í Føroyum, og til hetta krevst ein arbeiðsgevaraváttan.

Tak niður arbeiðsgevaraváttan her.

Heitt verður á útlendska arbeiðsmegi um at hava pass, arbeiðsloyvi og arbeiðskontrakt/setanarbræv til reiðar við passeftirlit, so tað verður lættari at koma gjøgnum marknaeftirlitið.

Kann útlendsk arbeiðsmegi taka eina test fyri at sleppa undan sóttarhaldi?

Frá 27. Juni er kunnu fólk ferðast til Føroya úr ávísum londum uttan at fara í sóttarhald ella heimauppihald. Treytin er tó, at øll ferðandi skulu kannast fyri COVID-19, tá tey koma til Føroya sjó- ella loftvegis. Somuleiðis verður heitt á øll ferðandi at fara í heimauppihald, til tey hava fingið svar á kanningina. Harumframt verður mælt til, at øll ferðandi lata seg kanna aftur seks dagar eftir komu til Føroya. Øll ferðandi eiga at vísa serligt varsemi hesa tíðina.

Legg til merkis: londini kunnu broytast frá viku til viku, tí talan er ferðandi úr Stóra Bretlandi, ES og Schengen-samstarvinum, har smittutalið er minni enn 20 smittað fyri hvørjar 100.000 íbúgvar um vikuna, og at londini hava ávísar skipanir viðvíkjandi korona-kanningum.

Eru kanningarnar ókeypis?

Kanningarnar eru ókeypis til og við 31. oktober 2020

Hvar verða kanningarnar gjørdar?

Kanningarnar verða gjørdar á flogvøllinum, tá ferðast verður loftvegis, og áðrenn fráferð í Hirstshals, tá ferðast verður sjóvegis. Harumframt verður mælt til, at øll ferðandi lata seg kanna aftur seks dagar eftir komu til Føroya. Øll ferðandi eiga at vísa serligt varsemi hesa tíðina.

Kanningarstøðir eru settar upp kring landið, har fólk kunnu lata seg kanna uttan ávísing.

Um arbeiðsgevarar og starvsfólk ynskja at gera kanningar av starvsfólkum ber eisini til at keypa Covid-19 kanning frá fyritøkuni Thetis.

Hvørjar skyldur hevur arbeiðsgevarin mótvegis útlendskum starvsfólki, sum eru í Føroyum?

Tað er umráðandi, at útlendsk starvsfólk verða kunnað um støðuna og tey tiltøk, sum myndugleikarnir hava sett í verk. Skilir starvsfólkið ikki føroyskt, eigur arbeiðsgevarin at syrgja fyri, at starvsfólkið fær neyðugu kunningina. Um so er, at starvsfólk av útlendskum uppruna mugu í sóttarhald, má arbeiðsgevarin tryggja, at hesi hava nøktandi liviumstøður.

Eru útlendingar fevndir av hjálparpakkanum?

Útlendingar, sum hava ein bústað í Føroyum, og eru millum 16 og 67 ár eru fevndir hjálparpakkanum.

corona.fo Ferðing