Dagført av Vinnuhúsinum tann 23. november 2020

Útlendsk arbeiðsmegi

Arbeiðsgevarar mugu framvegis átaka sær eina víðkaða skyldu at syrgja fyri, at útlendsk starvsfólk fáa greiða kunning um støðuna og almennu tilmælini fyri atburð í sambandi við coronavirus COVID-19.

Eisini má arbeiðsgevarin tryggja sær, at útlendsku starvsfólkini skilja tilmælini frá myndugleikunum.

Um so er, at starvsfólk av útlendskum uppruna mugu í sóttarhald, má arbeiðsgevarin tryggja, at hesi hava nøktandi liviumstøður.

Á heimasíðuni www.corona.fo er kunning, sum tit kunnu brúka. Kunningin er eisini á enskum máli.

Atgongdin til landið er avmarkað og skilt verður millum loyvd lond og karantenulond.Tað ber tó til at ferðast úr einum karantenulandi til Føroya í arbeiðsørindum. Henda heimild verður givin teimum sum hava arbeiðsloyvi og hava eitt viðurkenningarvert starv ella viðurkenningarverda arbeiðsuppgávu at røkja, sum skal loysast á einum arbeiðsplássi í Føroyum.

Útlendsk arbeiðsmegi eigur áðrenn fráferð til Føroya, sjóvegis ella loftvegis, at lata seg kanna tríggjar dagar undan fráferð, har tað er møguligt. Síðani verða tey kannaði aftur við komu til Føroya ella við fráferð við Norrønu. Seks dagar eftir komu til Føroya er tilmælið at taka enn eina COVID-19 kanning.

Tá komið er til Føroya er tilmælið, at útlendsk arbeiðsmegi  skal vísa serliga varsemi í 10 dagar, um tey koma frá einum karantenulandi. Koma tey frá einum ikki karantenulandi, skulu tey vísa serligt varsemi, til svar er komið frá Covid-19 kanningini frá sætta degi. Serligt varsemi merkir, at starvsfólk skulu verða avskorin frá øðrum og harvið ikki koma í samband við onnur á arbeiðsplássinum.

Arbeiðsfólk skulu veita prógv fyri, at tey hava arbeiðsørindi í Føroyum, og til hetta krevst ein arbeiðsgevaraváttan.

Tak niður arbeiðsgevaraváttan her.

Heitt verður á útlendska arbeiðsmegi um at hava pass, arbeiðsloyvi og arbeiðskontrakt/setanarbræv til reiðar við passeftirlit, so tað verður lættari at koma gjøgnum marknaeftirlitið.

Kann útlendsk arbeiðsmegi taka eina test fyri at sleppa undan sóttarhaldi?

Øll ferðandi skulu lata seg kanna tríggjar dagar fyri fráferð, við komu og tú fert beinleiðis í heimauppihald, til kanningarúrslitið er tøkt.

Útlendsk arbeiðsfólk, sum koma úr einum karantenulandi skulu vera serliga ansin í 10 dagar eftir komu til Føroyar. Hetta merkir, at tey eru saman við so fáum sum til ber, og tey koma ikki saman við øðrum uttan so, at til ber at verða avskorin frá fólki.

Útlendsk arbeiðsfólk, sum koma úr einum landið, sum ikki er karantenuland eiga at verða serliga ansin frá tí degi komið verður til Føroya og til kanningarúrslitið frá sætta degi er tøkt.

Legg til merkis: listin við karantenulondum kann broytast frá viku til viku, alt eftir gongdini í smittutalinum. Tað er tí umráðandi at kunnu seg um støðuna, áðrenn starvsfólkið kemur til landið.

 

Eru kanningarnar ókeypis?

Frá 1. oktober er kostnaðurin kr. 312,00. (Avgjaldið er frítikið fyri meirvirðisgjald.)

Hvar verða kanningarnar gjørdar?

Kanningarnar verða gjørdar á flogvøllinum, tá ferðast verður loftvegis, og áðrenn fráferð í Hirstshals, tá ferðast verður sjóvegis. Harumframt verður mælt til, at øll ferðandi lata seg kanna aftur seks dagar eftir komu til Føroya. Øll ferðandi eiga at vísa serligt varsemi hesa tíðina.

Kanningarstøðir eru settar upp kring landið, har fólk kunnu lata seg kanna uttan ávísing.

Um arbeiðsgevarar og starvsfólk ynskja at gera kanningar av starvsfólkum ber eisini til at keypa Covid-19 kanning frá fyritøkuni Thetis.

Hvørjar skyldur hevur arbeiðsgevarin mótvegis útlendskum starvsfólki, sum eru í Føroyum?

Tað er umráðandi, at útlendsk starvsfólk verða kunnað um støðuna og tey tiltøk, sum myndugleikarnir hava sett í verk. Skilir starvsfólkið ikki føroyskt, eigur arbeiðsgevarin at syrgja fyri, at starvsfólkið fær neyðugu kunningina. Um so er, at starvsfólk av útlendskum uppruna mugu í sóttarhald, má arbeiðsgevarin tryggja, at hesi hava nøktandi liviumstøður.

Eru útlendingar fevndir av hjálparpakkanum?

Útlendingar, sum hava ein bústað í Føroyum, og eru millum 16 og 67 ár eru fevndir hjálparpakkanum.

corona.fo Ferðing