Útlendsk arbeiðsmegi

Útlendingar, sum hava ein bústað í Føroyum og eru millum 16 og 67 ár, eru fevndir hjálparpakkanum.

Ja. Útlendingar kunnu koyrast heim við útgjaldi frá ALS. Treytirnar eru, at viðkomandi:

• - er í starvi hjá føroyskum arbeiðsgevara
• - hevur fylt 16 ár, men ikki 67 ár
• - hevur bústað í Føroyum.

Tað er einki krav um, at mann skal hava rindað inn til ALS frammanundan.

Útlendskur arbeiðstakari kann koma til Føroya at arbeiða, um viðkomandi hevur eitt týdningarmikið starv at røkja í landinum ella eina týdningarmikla arbeiðsuppgávu, sum skal loysast á einum arbeiðsplássi í Føroyum. Mett verður um hetta í hvørjum einstøkum føri.

Útlendingar, sum koma til landið, skulu fylgja tilmælunum frá heilsumynduleikunum. Sí leinki niðanfyri.

Tilmælt verður at vera í heimauppihaldi í 14 dagar, men í serligum førum ber til at skipa arbeiðspláss og uppihaldið soleiðis, at hesi kunnu koma beint í arbeiði. Tá skulu hesi atlit takast:

• Best er, at útlendsk arbeiðsmegi ferðast í bili fyri seg – eisini frá flogvøllinum.
• Best er, at útlendsk arbeiðsmegi býr fyri seg sjálva og hevur egnan køk og egið vesi.
  • Ber hetta ikki til, verður tilmælt at:
    • Tað verður gjørt reint regluliga, serliga á vesinum, í køkinum og í rúmum, sum verða nógv brúkt.
    • Handklæði, seingjarlín og undirklæði verða vaskað við min. 80 stigum
    • Mint verður á handreinføri.
• Fáa mat fluttan til bústaðin – ikki fara í matvøruhandlar at keypa.
• At arbeiðsstaðið er innrættað soleiðis, at útlendsk arbeiðsmegi ikki er nærri enn 2 m við onnur starvsfólk á arbeiðsstaðnum.
• At amboð, útgerð og klæðir hjá útlendsku arbeiðsmegini verða hildin atskild frá amboðum, útgerð og klæðum hjá øðrum á arbeiðsstaðnum.
  • Ber hetta ikki til, er neyðugt at vaska ella sóttreinsa, áðrenn onnur brúka amboðini, útgerðina ella klæðini.
• Arbeiðsgevarar eiga at hava mannagongdir, ið tryggja, at útlendsk arbeiðsmegi verður kunnað um, hvørji tilmæli eru í Føroyum í mun til COVID-19 og vandan fyri smittu.
  • Kunning er á enskum á www.corona.fo. Eisini eru plakatir á donskum og enskum at finna á https://www.sst.dk/da/Viden/Smitsomme-sygdomme/Smitsomme-sygdomme-A-AA/Coronavirus/Spoergsmaal-og-svar/Questions-and-answers
• Serliga umráðandi er at kunna um:
  • At tey ikki eiga at verða nærri øðrum fólki enn 2 m í longri enn 15min
  • At tey eiga als ikki hava beinleiðis samband við fólk í vandabólki
  • At tey skulu vera varug við sjúkueyðkenni, ið kunnu benda á, at ein hevur fingið coronavirus, t.e. fepur o.a.
• Arbeiðsgevarar eiga at hava mannagongdir tøkar, ið greiða frá, hvussu verður gjørt, um tann útlendska arbeiðsmegin kennir seg sjúka.

Tá heimauppihaldið, sum er 14 dagar, er liðugt, kunnu útlendsku starvsfólkini ferðast á arbeiðsplássinum og uttandura á sama hátt sum onnur í landinum. Tó skulu øll, bæði føroyingar og útlendingar, fylgja leiðreglum, sum myndugleikarnir til eina og hvørja tíð seta í sambandi við coronavirus.

Minst eisini til, at øll, ið koma til Føroya, skulu gjøgnum hert marknaðareftirlit. Neyðugt er hjá arbeiðsgevarum at útvega útlendskari arbeiðsmegi, sum skal til Føroya, eina váttan um, at viðkomandi hevur eitt arbeiði í Føroyum. Á tann hátt væntast, at tað verður lættari at koma gjøgnum marknaeftirlitið.

Tað er umráðandi, at útlendsk starvsfólk verða kunnað um støðuna og tey tiltøk, sum myndugleikarnir hava sett í verk. Skilir starvsfólkið ikki føroyskt, eigur arbeiðsgevarin at syrgja fyri, at starvsfólkið fær neyðugu kunningina. Um so er, at starvsfólk av útlendskum uppruna mugu í sóttarhald, má arbeiðsgevarin tryggja, at hesi hava nøktandi liviumstøður.