Valid 2022 Valid 2022
Føroya Handverksmeistarafelag

Fleiri møguleikar at taka yrkisútbúgving í Føroyum!

Tað er stórur eftirspurningur eftir eitt nú byggismiðum, men skúlagongdin kann framvegis ikki takast í Føroyum. Eisini er vandi fyri at føroyska samfelagið kemur at mangla grundleggjandi førleikar, um tað ikki verður møguligt at skipa skúlagongdina fyri smærri fak í Føroyum.

Tað stutta av tí langa

Havið eitt breitt útboð av yrkisútbúgvingum, tí okkum tørvar hesar førleikar í Føroyum.

    - Fá skúlagongdina til byggismið stovnsetta í Føroyum
    - Skipa smærri hold til fleiri fak  

Tað er stórur eftirspurningur eftir eitt nú byggismiðum, men skúlagongdin kann framvegis ikki takast í Føroyum. Eisini er vandi fyri at føroyska samfelagið kemur at mangla grundleggjandi førleikar, um tað ikki verður møguligt at skipa skúlagongdina fyri smærri fak í Føroyum.

Í dag er skipanin soleiðis háttað, at eitt ávíst árligt tal av lærlingum ger av, hvørt vit skulu hava hesar førleikar í framtíðini. Tað merkir, at tað er nærum vónleyst at fáa nýggjar førleikar, tí lærlingar blíva ikki settir, av tí at skúlagongdin ikki er í Føroyum.

Byggismiðurin

Tað er sera stórur tørvur á byggismiðum í Føroyum. Lógin um byggismið kom í gildi í 2008, men kunngerðin bleiv ongantíð lýst. Tí mugu lærlingar í byggismið til Danmarkar at taka skúlagongdina. Føroya Handverksmeistarafelag heldur, at tað er uppá tíðina, at skúlagongdin verður skipað í Føroyum. Byggismiðir, eru tey, sum gera nakrar av teimum fyrstu uppgávunum í einari byggiverkætlan, so sum at stoypa betongkonstruksjónina, ið skal halda restina av bygninginum uppi. Tørvskanning, sum Føroya Handverksmeistarafelag gjørdi í 2016 vísti, at miðaltalið fyri settar byggismiðslærlingar vildi verið 34 um árið, um skúlagongdin var í Føroyum

 

Samskipa smærri hold

Av teimum áleið 70 yrkisútbúgvingunum, sum kunnu takast í Føroyum, hava bert tær 13 skúlagongd í her heima. Gaman í eru hetta útbúgvingarnar við flest lærlingum, men tørvur er á at hava eitt munandi meira fjølbroytt útboð í Føroyum. Føroya Handverksmeistarafelag óttast fyri, at týdningarmiklir førleikar hvørva úr samfelagnum, um teknisku skúlarnir ikki fáa rásarúm at skipa útbúgvingar við smærri holdum.

 

Vanliga ásetingin er, at tað skulu vera um 10 lærlingar, sum byrja á einum holdi, fyri at tað fíggjarliga skal kunna forsvarast. Føroya Handverksmeistarafelag mælir til, at hetta talið lækkar munandi, t.d. til 4 lærlingar fyri at byrja eitt hold. Hetta hevði sjálvsagt havt ein ávísan kostnað við sær, men heldur eigur hetta at vera sætt sum ein íløga í førleikar.

 

Fyri at nevna nøkur, so hevði tað verið upplagt at hava undirvísing fyri snikkarar, málarar, gartnarar, múrarar o.o. í Føroyum.

Stutt um Føroya Handverksmeistarafelag

Føroya Handverksmeistarafelag er stovnað í 1957 sum eitt landsfelag fyri handverksmeistarar. Felagið er meginfelag fyri fimm lokal feløg, sum eru:

 

Havnar Handverkameistarafelag

Meistarafelagið í Klaksvík

Eysturoyar Handverksmeistarafelag

Suðuroyar Meistarafelag

Vága Handverksmeistarafelag

 

Felagið er limur í Føroya Arbeiðsgevarafelag og einstøku virkini eru tí eisini limir og hava atgongd til allar tænastur hjá Vinnuhúsinum.

Samband

Magnus Magnussen, nevndarformaður í Føroya Handverksmeistarafelag

elmek@post.olivant.fo

 

Marius Thomassen, ráðgevi

marius@industry.fo

 

Nevndin í Føroya Handverksmeistarafelag:

Magnus Magnussen, nevndarformaður

Petur Frank Joensen, næstformaður

Jens Kristian Haraldsen

Sjúrður Holm

Dávur Kunoy Høgnason