Tíðindi: Ferðavinna Ι 11. oktober 2021
Ráðstevna um endurskapandi ferðavinnu
NORA og Visit Faroe Islands skipa 19. og 20. oktober fyri norðurlendskari ráðstevnu á Hotel Føroyum

Spurningarnir, sum verða viðgjørdir á ráðstevnuni, eru millum annað, hvat endurskapandi ferðavinna er, og hvussu vit tryggja, at ferðavinna kemur íbúgvum á staðnum til góðar.

 

Høvuðsrøðarin Anna Pollock hevur drúgvar royndir á økinum, bæði sum granskari og ráðgevi hjá visit-feløgum kring heimin. Hon hevur í fleiri ár víst á týdningin av at skipa ferðavinnuna soleiðis, at hon er til fyrimuns fyri øll, sum eru knýtt at einum ferðamáli, tvs. bæði vinnuni, íbúgvunum á staðnum, náttúruni og ferðafólkunum

 

Umframt Onnu Pollock verða eisini framløgur um, hvat kann gerast fyri at tryggja, at ferðavinnan er góð fyri tey fastbúgvandi, har ferðavinna tekur seg upp.  Stjórin á Visit Norway leggur fram um teirra nýggju ferðavinnustrategi, og Zita Cobb úr Nýfunlandi fer at greiða frá verkætlanini um Fogo Inn.

 

Umframt hetta verða eisini styttri framløgur, har ferðavinnuveitarar úr Norðanlondum greiða frá við ítøkiligum dømum um, hvussu tey hava skipað teirra ferðavinnu burðadygt.

 

Ráðstevnan er ætlað starvsfólkum í ferðavinnuni, lands- og kommununalpolitikkarum og teimum, sum hava áhugað í ferðavinnuni.

 

Nærri kunning og tilmelding er á heimasíðuni hjá NORA: https://nora.fo/regenerative-2021

Fleiri tíðindi
Fleiri tíðindi