Sambært norska fiskimálaráðharranum, Helgu Pedersen, fer hetta saman við øðrum tiltøkum at tryggja, at fiskiskapurin í 2010 kann fara fram so vanligt sum møguligt.

Uppskot er eisini lagt fyri Stórtingið um at tillaga málbólkin, ið er fevndur av verandi garantirammu á 97,5 mió.nkr., soleiðis at garantiirnir koma at galda fyri alla móttøku av fiski og uttan avmarkingar í mun til uppbygging av goymslu.

Norska stjórnin ber ótta fyri, at partar av fiskivinnuni ikki hava nøktandi gjaldføri til at tryggja neyðugu móttøkuorkuna til at avgreiða toskafiskiskapin í 2010. Hetta kann viðføra óhepnar avleiðingar fyri fiskimenn og tær bygdir, ið liva av toskafiskiskapinum. Stjórnin kann kortini ikki endurrinda vinnuni tey tap hon hevur havt, og við einari nýggjari gjaldførislániskipan og tillagaðum garantirammum ynskir stjórnin tí at geva sítt íkast til at bøta um gjaldførisavbjóðingina, sum nógvar fiskivinnufyritøkur hava.

Tað verða framvegis stillað krøv til kredittvirði hjá fyritøkunum, og um tær skulu fáa lut í gjaldførislánunum ella garantirammuni, er eisini neyðugt, at peningastovnarnir luttaka við at átaka sær partar av økta váðanum.

Gjaldførislán kunnu játtast upp til 3 ár, og skulu latast við vanligum treytum. Gjaldførislánskipanin kemur ikki í staðin fyri vanligar rakstrarfíggingar, men er ætlað at styrkja fíggjarliga grundarlagið í feløgunum.

Hóast Stórtingið fyrst má samtykkja bæði gjaldførislániskipanina og tillagingarnar av garantiskipanini, áðrenn Innovasjon Norge kann geva nakra endaliga tilsøgn, mælir norski fiskimálaráðharrin einstøku fyritøkunum til at seta seg í samband við Innovasjon Norge, fyri at kanna, hvørjar møguleikar tær hava at fáa tilsøgn um lán og garantiir.