Kundar í føroysku peningastovnunum, sum hava lán við broytiligari rentu, hava nú møguleika at fáa beinleiðis kunning um rentubroytingar, sum hava ávirkan á teirra lán, um netbankan, í telduposti ella í brævi. Í kunningini er yvirlit yvir hvørji lán verða ávirkað av broytingini.

Kundar, sum hava netbanka, fáa boð beinleiðis umvegis netbankan. Teir kundar, sum ikki hava netbanka, kunnu venda sær til sín peningastovn og tekna seg til at fáa beinleiðis boð antin í telduposti ella í brævi.

“Hetta fer at gera tað væl lættari hjá kundum okkara at fylgja við gongdini í rentunum á egnum lánum og øðrum viðurskiftum”, sigur Janus Petersen, formaður í felagnum Føroyskir Peningastovnar, sum vónar, at fólk fara at taka væl ímóti nýggja møguleikanum.

Peningastovnarnir fara tó framvegis eisini at kunna um rentubroytingar á heimasíðunum.