Nú ber til hjá fyritøkum at rokna sítt CO2-útlát fyri 2023 við føroyska CO2-roknaranum. Hetta kunngerð Umhvørvisstovan, ið hevur ábyrgd av at árligu dagføringini av CO2-roknaranum
CO2-roknarin er eitt rokniamboð í Excel, ið fyritøkur kunnu nýta til at gera upp sítt árliga CO2-útlát. Sambært altjóða leiti verður útlátið býtt upp í trý vav:
- Vav 1: Útlát frá brennievnum og kølievnum
- Vav 2: Útlát frá elnýtslu og fjarhita
- Vav 3: Útlát frá allari virðisketuni (15 bólkar, harav 6 bólkar eru tøkir í CO2-roknaranum)
Tá fyritøkur rokna sítt útlát fyri fyrstu ferð
Fyrstu ferð, ið ein fyritøka skal gera upp sítt útlát, er skilagott at bert gera hetta fyri vav 1 og 2. Til at rokna hetta útlátið er neyðugt at fáa hesi hagtøl til vega:
- Nøgd av brennievni (frá orkufeløgum)
- Nøgd av kølievni, ið er fylt á (innanhýsis rokning)
- Elnýtsla (frá SEV)
- Fjarhitanýtsla (frá Fjarhitafelagnum)
Eru fyrispurningar ella ivamál um CO2-roknarin, ber til at venda sær til Vinnuhúsið ella beinleiðis til Umhvørvisstovuna fyri at fáa vegleiðing.
Allir CO2-roknarar (2021, 2022 og 2023) kunnu takast niður á heimasíðuni hjá Umhvørvisstovuni her: Luft og veðurlag - Umhvorvisstovan (us.fo)
