Cruiseferðavinnan veksur, og møguleikarnir eru stórir. Týsdagin 3. mars kl. 13 skipar Sjóvinnufelagið fyri almennum kunnandi tiltaki um, hvussu vinnan kann skapa størri virði fyri føroyskt vinnulív.
Cruiseskip vitja í vaksandi tali, men gagnnýta vit veruliga teir vinnuligu møguleikarnar? Á tiltakinum verður sjóneykan sett á, hvussu cruiseferðavinnan kann gerast ein sterkari og meira virðisskapandi partur av føroyska vinnulívinum.
Cruiseferðavinnan er ein vaksandi partur av altjóða ferðavinnuni, og Føroyar hava seinastu árini merkt ein støðugan áhuga frá reiðaríum og ferðaskipum. Hetta skapar møguleikar. Ikki bert fyri ferðavinnuna, men ein breiðan part av føroyska vinnulívinum.
Havnir, tænastuveitarar, veitingarfyritøkur, flutningsvinnan og aðrar tænastur á landi kunnu økja sítt virksemi, um karmarnir eru greiðir og samstarvið væl skipað. Spurningurin er, hvussu vit tryggja, at ein størri partur av virðisskapanini verður eftir í Føroyum.
Við røttum treytum kann cruiseferðavinnan gerast ein týðandi inntøkukelda og skapa arbeiðspláss. Tað krevur tó eina meira miðvísa tilgongd og eitt positivt og realistiskt sjónarmið á vinnuna.
Tiltakið týsdagin 3. mars kl. 13 er alment og ókeypis, men krevur tilmelding. Nærri kunning um skránna og stað verður kunngjørd í næstum.
