Kvinnurnar koma nærri og nærri støðuni hjá monnunum á arbeiðsmarknaðinum. Í øllum førum er vinnuluttøkan hjá kvinnum farin at líkast tí hjá monnunum meira og meira.

Fyri 20 árum síðani arbeiddi næstan triðja hvør kvinna í arbeiði færri enn 29 tímar um vikuna. Tað gjørdu bert fáir menn. Í dag eru tað bara 5-7% av kvinnunum, sum hava ein arbeiðstíð undir 27 tímar um vikuna. Serliga kvinnur í almenna geiranum eru farnar frá tí lítla tilknýtinum til arbeiðsmarknaðin. Men gongdin er eisini týðilig í privata geiranum.

Hetta vísir ein analysa úr arbeiðsmarknaðarfrágreiðingini hjá Dansk Arbejdsgiverforening.

Lektor Mette Verner av Handilsháskúlanum í Århus hevur granska í kynsmunum á arbeiðsmarknaðinum. Hon heldur, at kvinnum so við og við eru komnar á eitt støði og hava fingið størv, sum krevja nær við fulla tíð.

“Kvinnur vilja klára seg sjálvar, og í mun til fyrr er tað vorðið vanligt at hava ein javnt tilknýti til arbeiðsmarknaðin. Kvinnur yvirhála í løtuni menn á útbúgvingarstigi, og eg haldi, at um tíggju ár fer tað at vera ein sera lítil munur á arbeiðsmarknaðarluttøkuni hjá kvinnum og monnum,” sigur hon.

Hon heldur, at í mun til onnur lond er tann danska fertilitetsratan ikki fallin í tíðarskeiðnum orsakað av barnaansingarskipanini. “Børn hava framvegis ávirkan á vinnuluttøkuna hjá kvinnum. Tá børnini eru smá, minka nógvar kvinnur um arbeiðið. Tað er vanliga teirra egna væl, og tað er helst ringt at koma uttanum,” sigur hon.

Munurin millum vinnuluttøkuna hjá kynunum er eisini fallin munandi síðan 1986. Í 1986 vóru menn í aldrinum 50-59 í meðal næstan 20% meira á arbeiðsmarknaðinum enn javngamlar kvinnur. Í 2006 er munurin minkaður til 5%.

Tað er ein sera ógvuslig gongd og ein positiv gongd, men hóast hetta kann hon vera eitt sindur ørkymlandi, heldur vælferðargranskari, professor Peder Pedersen frá Århus Universitet.

“Tí hetta strikar undir trupulleikan, vit hava í Danmark, nemliga at vit ikki hava so stóra eykamanning at seta inn, tá okkum manglar arbeiðsmegi. Hóast fíggjarkreppuna fer okkum eisini í framtíðini at mangla arbeiðsmegi við ávísum førleikum, og í mun til nógv onnum evropisk lond eru tað ikki kvinnurnar, vit kunnu nýta, tí tær eru longu á arbeiðsmarknaðinum,” sigur hann.