Endamálið við nýggja felagnum er m.a. at betra vinnumøguleikarnar í ferðavinnuni, at arbeiða fyri útbúgving og menning av starvsfólkum í vinnuni og at tryggja ferðavinnuni eina felags rødd.

Talan er um eitt vinnufelag, sum er ætlað fyritøkum, ið reka ferðavinnu á vinnuligum grundarlagi. Á stovnandi aðalfundinum meldaðu gott 30 fyritøkur seg í felagið, men væntandi verður limatalið nakað hægri enn hetta.

Nýggju fólk vórðu uppstillað til fyrsta nevndarvalið og aftaná eina spennandi atkvøðugreiðslu vórðu hesi vald: Jákup Sverri Kass (Smyril Line), Henny á Líknagøtu (Atlantic Airways), Ása Johnsdóttir (Hotel Hafnia), Fríðun Hansen (GreenGate Incoming) og Magni Blástein (Fiskiferðir). Eykalimur gjørdist Finn Johannsen (Vilt). Nevndin hevur ikki skipað seg enn.

Dagurin byrjaði við døgurða og síðani vóru nakrar framløgur áðrenn sjálvt felagið varð stovnað. Oda Andreassen, deildarleiðari hjá Føroya Tele, tosaði um vørumenning við íblástri frá øðrum norðanlondum. Áðrenn Oda fór í starv á Føroya Tele hevur hon arbeitt nógv í ferðavinnuni og hevur drúgvar royndir úr m.a. Føroyum, Danmark og Svøríki. Súsanna Sørensen, deildarleiðari á SamVit hevði eina framløgu við heitinum “Soleiðis branda vit Føroyar”, ið m.a. kunnaði um virksemið hjá SamVit. Magni Arge, stjóri í Atlantic Airways, hugleiddi síðani um hvat ferðavinnan kann brúka eitt ferðavinnufelag til, og at enda greiddi Erna Hauksdóttir frá hvussu íslendska ferðavinnan arbeiðir. Erna Hauksdóttir er stjóri í Samtøk Ferðatjónustunnar (SAF), ið er tað íslendska ferðavinnufelagið.