Fríggjadagin 10. november verður Ferðavinnustevna á Panorama á Hotel Hafnia. Ráðstevnan verður frá kl. 16.00 – 18.00, og veitslan frá kl. 18.00, tá eisini ársins heiðursbrøv verða handað.

Stevnan er skipað við ráðstevnu seinnapart og síðani veitsluhaldi um kvøldið, tá eisini ársins ferðavinnufólk, ársins eldsál og ársins nýbrot verða kosin. Lagt verður upp til ein kveikjandi, áhugaverdan og stuttligan dag, har vit seta føroysku ferðavinnuna í fokus og hátíðarhalda ferðavinnuárið 2023.

Tað er Ferðavinnufelagið, sum skipar fyri Ferðavinnustevnuni. Endamálið er at savna ferðavinnuna til hátíðarhald, íblástur og óformliga samveru. Stevnan hevur verið hildin síðani 2015, tó ikki í 2020 vegna korona.

Seinasta freist at melda til Ferðavinnustevnuna er mikudagin 8. november á midnátt.

Veitslan byrjar kl. 18.00 beint eftir ráðstevnuna. Byrjað verður við ábiti í Katrinu Christiansen og kl. 19.30 verður farið í veitsluhølið Panorama.