Fríggjadagin 7. november verður Ferðavinnustevna á Hotel Hilton. Ráðstevnan verður frá kl. 15.30 – 18.00, og veitslan frá kl. 18.00.
Stevnan er skipað við ráðstevnu seinnapart og síðani veitsluhaldi um kvøldið, tá eisini ársins heiðursbrøv verða handað. Lagt verður upp til ein kveikjandi, áhugaverdan og stuttligan dag, har vit seta føroysku ferðavinnuna í fokus og hátíðarhalda ferðavinnuárið 2025.
Tað er Ferðavinnufelagið, sum skipar fyri Ferðavinnustevnuni. Endamálið er at savna ferðavinnuna til hátíðarhald, íblástur og óformliga samveru.
Hvat er á skránni?
Julie Lindegaard
I filmens fodspor – erfaringer og faldgruber i arbejdet med filmturisme
Julie hevur í fleiri ár arbeitt við ferðavinnu. Hon hevur bæði undirvíst ferðavinnuaktørum í strategiskari sjónligheit og harumframt hildið fyrilestrar serliga ætlað teimum sum eru virkandi innan ferðavinnu.
Eisini hevur Julie nógvar royndir innan filmferðavinnu, og hevur sjálv staðið sum verkætlanarleiðari í verkætlanini hon kallar: satsningen Juleøen Fyn - en fynsk turismesatsning.
Sóley Heradóttir Hammer
Samstarv og nýskapan: tiltøk sum menna ferðavinnuna
Sóley er leiðari í Hugskotinum og ein av hennara mongu uppgávum er millum annað at fyriskipa tiltøk. Millum tiltøkini hon stendur aftanfyri kunnu nevnast Nýskapan í Ferðavinnuni og Tonik.
Sóley fer á Ferðavinnustevnuni at greiða frá, hvussu Hugskotið arbeiðir við at menna ferðavinnuna – bæði við íverksetarainnsatsum so sum vinnudíkjarnum ‘Nýskapan í ferðavinnuni’ og við altjóða tiltakinum TONIK. Og hvussu samstarv er eitt lykilorð í hesum sambandinum.
Eydna Skaale
Retorikkur sum eitt amboð
Eydna er lærdur retorikari og hevur fingið heiðurin sum Award winning speechwriter. Sum retorikkari er Eydna serfrøðingur í málrættaðum samskifti. Hvussu eydnast tað at samskifta sín boðskap til ein ávísan bólk? Kann retorikkur ávirka eina uppliving hjá gestum?
Eydna fer at greiða frá hvønn týdning retorikkur kann hava og hvussu tað ber til at røkka einum góðum sambandi millum veitara og gestir í ferðavinnuhøpi.
