Dagurin byrjaði kl. 14.00 í Sigmundarstovu á Hotel Tórshavn við stuttari framløgu og ábiti. Fyrireikararnir høvdu lagt eina spennandi skrá til rættis. Umframt eina rundvísing á Hotel Tórshavn vitjaðu tey luttakandi Etika og Áarstovu í bólkum og fingu eisini ein túr við Rib62. Á Etika og Áarstovu var ymiskt bjóðað til matna og greitt var frá virkseminum. At enda savnaðust tey luttakandi til hugna á Hvonn.

Hetta er fimta ferðavinnuvitjanin, síðani Ferðavinnufelagið fyri einum lítlum ári síðani fór undir hetta átak fyri limir felagsins. Endamálið við ferðavinnuvitjanunum er at økja um kunnleikan hjá limunum um virksemið hjá hvør øðrum og í longdini at eggja til samstarv í vinnuni. Næsta ferðavinnuvitjanin verður væntandi miðskeiðis í mai mánaði.