Tað er neyðugt at fáa fiskavirkisskipanina aftur á beint. Aftur til tað, hon upprunaliga var ætlað til: Eina skipan fyri vanligu flakavirkini.

Tað heldur Føroya Ráfiskakeyparafelag, nú orðaskiftið um fiskavirkisskipanina er kyknað aftur. Enn einaferð hoyrast røddir, sum vilja týdningarmiklu skipanini til lívs. Loysnin er ikki at taka skipanina av. Heldur skal skipanin broytast.

Ætlað vanligum flakavirkjum
Fiskavirkisskipan var upprunaliga ætlað vanligum flakavirkjum, har rávørutilgongdin er skiftandi alt eftir, hvussu fiskiskapurin var. Í dag fevnir skipanin eisini um uppisjóvarvirki, kryvijivirkir og fiskamjølvirkir.

Seinastu árini hava fleiri sett spurning við um tað er rætt, at fiskavirkisskipanin er so breið. Hagtøl vísa eisini, at kryvjivirkini og uppisjóvarvirkini hava fingið meira enn helvtina av útgjøldunum í skipanini árini 2012 til 2022.

Týdningarmikil skipan
Fyri vanligu flakavirkini kring landið, sum í høvuðsheitum virka botnfisk, er fiskavirkisskipanin týdningarmikil. Flakavirkini stríðast støðugt og áhaldandi fyri at halda sítt virksemi í gongd. Við skiftandi fiskiskapi veitir fiskavirkisskipanin teimum trúføstu starvsfólkunum ein tryggleika. Av somu orsøk er tað óðamannaverk at taka skipanina av. Heldur skal skipanin broytast til tað, hon upprunaliga var ætlað til: Eina skipan fyri vanligu flakavirkini.