Føroysku vinnulívsfólkini á ferð í Grønlandi við løgmanni á odda komu í gjár til grønlendska høvuðsstaðin Nuuk. Móttøkan í Grønlandi er góð, og stórur áhugi er millum grønlendarar fyri at hoyra um royndir hjá føroyingum í sambandi við ráevnisvinnu, og um samstarvsmøguleikar við føroyingar.
Ávegis til Grønlands varð mánadagin steðgað á í Íslandi har føroyska ferðaliðið vitjaði aluminiumssmeltivirkið Alcoa á Reyðafjørðinum, har ferðaliðið fekk góða og áhugaverda kunning um virksemi hjá Alcoa og rundferð á virkinum.
Í Reykjavík varð eisini vitjað í tryggingarfelagnum Vørður, sum BankNordik eigur.
Í gjár, týsdagin, byrjaði føroyska ferðaliðið við at møtast í hølunum hjá BankNordik í Nuuk. Her kunnaðu Bjartur Nolsøe, leiðari hjá BankNordik í Grønlandi, og Edward Niclasen, eigari og stjóri á Nuuk Transport, føroysku luttakararnar um, hvørji atlit eru neyðug at taka, um ætlanir eru um at verða virkin á grønlendska marknaðinum. Eisini segði Eyðun Mørkøre, stjóri á TAKS, nøkur orð um, hvussu skattaviðurskiftini eru millum Føroyar og Grønland.
