Mánadagin 30. desember var árliga tiltakið Jobmatch í Østrøm, og fleiri enn 400 vitjandi høvdu leitað sær oman á Østrøm. Jobmatch er staðið, har lesandi og umboð frá luttakandi fyritøkum hittast, fyri at tosa um starvsmøguleilar og virksemið í føroysku vinnuni.
Vinnuhúsið luttók á Jobmatch, har vit vístu á heimasíðuna leinkjan.fo. Nógv fólk komu framvið básinum hjá Vinnuhúsinum, og áhugin fyri leinkjuni var stórur. Fleiri lesandi vístu áhuga í at fara undir størri verkætlanir, sum snúgva seg um føroyskar fyritøkur og føroysk viðurskifti.
Um kvøldið var kvøldseta við kjakfundi, har evnið var, hvussu vit skapa fólkavøkstur í Føroyum. Eitt nú greiddi Árni Olsen frá, hvussu hann hevði skapt sítt starv, tá hann kom heim eftir loknan lestur í útheiminum. Umleið 100 fólk luttóku til kvøldsetanina.
www.leinkjan.fo
Leinkjan er heimasíða, sum verður rikin av Vinnuhúsinum. Á leinkjuni kunnu fyritøkur skráseta verkætlanir til føroysk lesandi at nýta sum part av útbúgving síni. Lesandi kunnu eisini skráseta seg á leinkuni, so at fyritøkur síggja hvørjir føroyingar lesa ymiskar útbúgvingar. Endamálið er at skapa samband millum føroyskar fyritøkur og føroyingar undir útbúgving. Fá meira at vita á www.leinkjan.fo.
