Paris MoU hevur dagført avrikslistan yvir flaggstatir, og FAS fór tvey pláss aftur á listanum, frá nr. 28 til nr. 30. Tað hevur stóran týdning fyri skipini í FAS, at føroyska flaggið er á Hvítalista, sum er eitt tekin um trygd og góðsku á sjónum, og harvið eisini ávirkar kappingarføri hjá reiðaríunum.
Sjóvinnustýrið skrivar í tíðindaskrivi, at lægra plaseringin í ár tó ikki er orsakað av verri úrslitum hjá føroyskum skipum. Stigatalið er í veruleikanum betri hesaferð enn seinast. Tað er lutfallið millum talið av eftirlitum og afturhaldum, sum er broytt. Eisini hava onnur lond á listanum betrað seg og hava tí fingið eina betri plasering.
FAS hevur verið á Hvítalista fyri flaggstatir síðani 2011. Í hesum tíðarskeiði hava vit flutt okkum millum nr. 26 og 39. Í dag eru vit nr. 30.
Les tíðindaskrivið frá Sjóvinnustýrinum her: Føroyar detta 2 pláss á Hvítalista (fma.fo)
