Tørvurin á yrkislærdari arbeiðsmegi í Føroyum er stórur. Tað er ein niðurstøða í stóru spurnarkanningini hjá Vinnuhúsinum, har 100 fyritøkur eru spurdar um starvsfólkatørvin hjá privatu vinnuni í Føroyum.
Meira enn helmingurin av teimum fyritøkum, sum í løtuni ætla at seta fleiri starvsfólk í starv, vilja seta yrkislærd fólk í starv. Talan er um fyritøkur í ymiskum vinnugreinum, eisini eru tær ymiskar í stødd og eru staðsettar kring alt landið.
Fjølbroyttur tørvur
Fyritøkurnar leita millum annað eftir smiðjum, mekanikarum, sølufólkum, timburmonnum, kokkum, eletrikarar, sveisarum, alarum, snikkarum, bakarum og ymiskum tøknikarum.
Kanningin vísir eisini, at nógvar føroyskar fyritøkur í løtuni sóknast eftir starvsfólkum við KT-førleikum.
Skilagóð átøk
Í spurnarkanningini verða allar fyritøkurnar spurdar um, hvørji átøk eru skilabest at gera fyri at fáa fatur á røttu arbeiðsmegini. Svarini eru fjølbroytt. Mest vanligu svarini eru:
- Fleiri skulu eggjast til at taka eina yrkisútbúgving
- Menna og útbúgva fleiri fólk við KT-førleikum
- Serskattaskipanir skulu takast av
- Samstarvið millum útbúgvingarskipanina og vinnuna styrkjast
- Møguleikarnir at eftirútbúgva seg skulu betrast
- Fleiri og fjølbroyttari útbúgvingar setast á stovn í Føroyum
- Neyðugt at byggja fleiri bústaðir
- Lægri lønarskattur
- Starvsfólkarøkt vaksandi týdning
Stóra og umfatandi spurnarkanningin hjá Vinnuhúsinum verður í løtuni greinað nærri. Fleiri niðurstøður úr kanningini verða almannakunngjørdar seinni.
Um kanningina
Endamálið við kanningini er at fáa neyvari at vita, hvør ítøkiligi tørvurin hjá privatu vinnuni er. Í kanningini verður millum annað hugt nærri at tørvinum í teimum ymisku vinnugreinunum, og hvørt tað er brúk fyri ófaklærdum starvsfólkum, fólk við yrkisútbúgving ella starvsfólk við longri útbúgving. Eisini verður spurt nærri um, hvat slag av førleikum, sum tørvur er á. |
