Í dag er annar dagur á sølumessuni fyri sjómat í Brússel, har fleiri føroyskar fyritøkur luttaka. Tá dyrnar lótu upp í gjár, stóðu kundar uttanfyri og bíðaðu. Nógv fólk streymaðu til messuna frá morgunstundini av, heilt til messan lat aftur kl. 18:00.
Eisini føroyski landabásurin verður nógv vitjaður, og eftirspurningurin eftir føroyskum sjómati tykist at vera stórur.
Seafood Expo Global er heimsins stórsta sølumessa innan sjógæti, og føroyski landabásurin liggur í høllini, ið hevur flest vitjandi.
Hetta merkir, at nógv fólk koma framvið landabásinum, og luttakararnir hava góðar møguleikar at vísa á teirra vørur og at marknaðarføra føroyskan sjómat.
Við á básinum í ár eru Bakkafrost, Hiddenfjord, PRG Fiskavirkið, Varðin Pelagic, North Pelagic, JFK, Pelagos og Landshandilin.
