Frágreiðingin er gjørd út frá samrøðum, sum sendistovan hevur havt við føroyskar fyritøkur innan ymsar vinnugreinar. Talan var bæði um fyritøkur, sum innflyta vørur til víðari sølu og fyritøkur, sum innflyta vørur til egna framleiðslu. Fyritøkurnar vóru millum annað spurdar um royndir teirra við at innflyta bretskar vørur beinleiðis úr Bretlandi og um møguligar orsakir til, at tær ikki innfluttu fleiri bretskar vørur.

Fyrst í frágreiðingini verður hugt at innflutningi Føroya við serligum atliti at innflutningi av vørum, sum hava sín uppruna í Bretlandi. Síðani verður hugt eftir fríhandilssáttamála Føroyar við ES, og hvørjar møguleikar sáttmálin gevur. Eftir hetta verður hugt nærri at møguligum orsøkum til lága innflutningin av bretskum vørum. Síðani verða givin nøkur uppskot til, hvat møguliga kann gerast fyri at økja um innflutningin. Til seinast í frágreiðingini eru kontaktupplýsingar uppá fyritøkur, feløg og stovnar, sum møguliga kunnu hjálpa føroyskum fyritøkum at finna bretskar samstarvspartar.