Arbeiðsbólkurin, sum Landsstýrismaðurin í fíggjarmálum setti í januar í ár at gera frágreiðing um virksemi hjá Landsverk, handaði landsstýrismanninum sína frágreiðing fríggjadagin í farnu viku.
Til at umboða byggivinnuna setti Vinnuhúsið ráðgevan hjá Føroya Handverksmeistarafelag, Jóhan Syderbø, í bólkin. Afturat sær hevði Jóhan fylgibólkar umboðandi bæði byggifyritøkur og ráðgevaravinnuna.
Vinnuligu sjónarmiðini í frágreiðingini eru í høvuðsheitum hesi:
• at Landsverk, í sambandi við útveiting, við tíðini avmarkar sín leiklut á marknaðinum til bert at keypa vørur og tænastur frá vinnuni.
• at Landsverk, í sambandi við útbjóðingar, heldur seg til yvirskipaðar reglur, so sum ABF06.
• at Landsverk mennir sínar førleikar sum byggiharri og sáttmálapartur á økjum, sum hava við bygging og infrakervi at gera.
• at tað er gjøgnumskygni í játtanini til Landsverk.
Frágreiðingin viðger eisini møguleikar fyri samanlegging við aðrar almennar stovnar. Eitt av endamálunum er at styrkja um møguleikarnar at útveita, tí Landsverk hevur longu í dag drúgvar royndir við útbjóðing og sáttmálastýring.
