Áhugin fyri Vinnudegnum í ár er stórur, og væntandi verða omanfyri 300 føroysk vinnulívsfólk og fólk, sum hava tilknýti til føroyska vinnu, í Norðurlandahúsinum fríggjadagin 1. oktober.

Skráin fyri Vinnudagin 2010 er fjølbroytt við áhugaverdum fyrilestrum, spennandi kjaki og sjálvandi avdúkingini av Ársins Virki og Ársins Átaki.

Á skránni eru  fyrilestrar við Guðrið Weihe, ráðgeva innan alment-privat samstarv hjá COWI, Jørgen M. Clausen, nevndarformanni í Danfoss og Jamie Andrew, fjallaklintrara við ein serligari søgu.

Sum nakað nýtt á Vinnudegnum verður eitt spennandi kjak um støðuna í Føroyum í dag. Kjakið hava vit sett á skránna fyri at fáa sett orð á nøkur av teimum viðurskiftum, sum vit meta eru ein trupulleiki í samfelagnum, sum vit virka í, og sum forðar fyri menning av føroyska samfelagnum. Kjakluttakarar verða Súsanna Danielsen, stjóri á Løgtingsskrivstovuni, Hans Andrias Sølvará, adjunktur í søgu á Fróðskaparsetri Føroya og Pól Huus Sólstein, stjóri á Atlantic Pelagic. Kjakið verður stýrt av tveimum av okkara fremstu journalistum, Brynhild Thomsen og Una Arge.

Tilmelding til Vinnudagin fer fram á www.industry.fo ella við at ringja til Vinnuhúsið á telefon 309900.