Byggiharrasamtak Føroya og Ráðgevarafelagið skipa fyri fyrsta av trimum skeiðum í nýggju byggireglunum, sum taka støði í nýggju bygningskunngerðini, nevnd BK17.
Fyrsta skeiðið verður á Hotel Hafnia mikudagin og hósdagin 30. og 31. august. Freistin at tekna seg er mánadagin 28. august kl. 12.00.
Byggiharrasamtak Føroya og Ráðgevarafelagið ynskja, í samstarvi við Landsverk, at virka fyri, at byggivinnan er íklødd at umsita og handfara nýggju byggireglugerðina BK17, og bjóða í felag út skeið í nýggju byggireglunum. Talan verður um trý ymisk skeið, ið taka støði í BK17, og sum verða hildin seinna hálvár 2017.
Sum ein liður í at førleikamenna vinnuna, endar hvør dagur við einari roynd, ið – um royndin verður staðin – gevur eitt próvbræv. Byggiharrasamtak Føroya og Ráðgevarafelagið arbeiða fram ímóti, at byggiharrar og byggimyndugleikar í ávísum førum kunnu krevja, at tilfarið, sum verður latið inn við byggiumsóknini, er gjørt av fólki, sum hava próvbræv fyri at hava staðið roynd í BK17.
Ragnar Mouritsen frá Sp/f RAM og Søren Aggerholm frá SBI – Statens Byggeforskningsinstitut standa fyri fyrsta skeiðinum.
Skeiðið, sum verður hildið yvir tveir dagar, tekur støði í kapittul 7 í BK17, ið er ”Orka”. Fyrri dagurin verður um orku sum heild við atliti at BK17, meðan seinni dagurin snýr seg um útrokningar av orkukørmunum í forritinum BE15.
Skráin fyri skeiðið er hendan:
Dagur 1
08.15 Morgunmatur
08.30 Gjøgnumgongd av BK17 sum heild
10.00 Steðgur
10.15 Gjøgnumgongd av BK17 í mun til orku, kap. 7
12.00 Døgurðasteðgur
13.00 Broytt nýtsla og afturatbyggingar
14.15 Steðgur
14.30 Rentabilitetur
Blowerdoor-test
Orkurammu útrokning, Be15
15.30 Spurningar, kjak og eftirmeting
16.00 Liðugt
Dagur 2
09.00–16.00 Orkurammu útrokning við forritinum Be15. Luttakarir hava hvør sína teldu við.
Tað er ikki krav at tekna seg til báðar dagarnar, og sostatt møguligt bert at luttaka annan dagin. Kostnaðurin er 3.500 krónur fyri hvønn dagin, men um ein teknar seg til báðar dagarnar, er prísurin 6.000 krónur. Um ein ynskir at fara upp í roynd, kostar hvør roynd 1.000 kr, men um ein tekur báðar royndir, er prísurin 1.500 kr.
Tilmeldingin, sum er bindandi, fer fram hjá Byggiharrasamtaki Føroya, t-postur: malu@lv.fo, tlf. 290 880, og við at rinda luttøkugjaldið á kontu nr. 9181-128.220.6 og viðmerkja ”orkuskeið”.
