Nýggja alaraútbúgvingin fær góð skoðsmál.

Føroysku alifyritøkurnar fáa sera góðar afturmeldingarnar frá nýggju alaraútbúgvingini. Tað fegnast Havbúnaðarfelagið um, sum í sínari tíð heitti á Yrkisútbúgvingarráðið um at seta á stovn eina yrkisútbúgving innan aling.

Byrjaði í 2022
Alaraútbúgvingin byrjaði á heysti 2022 á miðnámi í Vestmanna. Útbúgvingin fer partvíst fram á miðnámi í Vestmanna og partvíst úti á læruplássinum hjá alifeløgunum. Tað eru alifyritøkurnar, sum sjálvar seta lærlingar. Ein partur av lærlingatilgongdini er síðani at fara á skúlabonk á miðnámi í Vestmanna. Ein flokkur verður tikin inn um árið.

Størri vitan og førleikar
Verandi alarar hjá føroysku alifyritøkunum eru bæði ágrýtnir og dugnaligir. Men framtíðin krevur alsamt fleiri alarar við størri vitan og førleikum at ala á landi og á sjónum. Avbjóðingarnar gerast ikki minni, um farið verður út á meira streymhørð øki ella opið hav at ala. Tørvur er tí á, at tey starvsfólk, sum byrja eina yrkisleið sum alarar, hava eitt gott ástøðiligt og praktiskt grundarlag, tá tey byrja at arbeiða í vinnuni.

Eitt nýtt skeið í alaraútbúgvingini byrjar í august.