Á Handilsvinnuráðstevnuni, sum Handilsvinnufelagið skipaði fyri 12. mai, greiddi Dorte Wimmer frá brúkaraatburðinum hjá størsta ættarliðnum í heiminum, teimum ungu sum eru millum 15 og 33 ár.
Dorte Wimmer greiddi frá, at hóast hetta ættarliðið krevur uppmerksemi og ynskir at verða sætt, so er talan um eitt ættalið, sum stúrir um framtíðina. Tey leggja tí dent á at hava tamarhald á egnum viðurskiftum, at klára seg sjálv, at hava góðar vinir, eina góða heilsu og at verða í góðari venjing.
Hava tey í hyggju at keypa eina vøru, so fyrireika tey seg væl, áðrenn keypið verður framt. Tey brúka við skili men eru tó til reiðar at rinda eitt sindur eyka, um tey fáa eina góða uppliving afturfyri. Hetta setur krøv til tænastustøðið, tí góða upplivingin er ofta tengd at góðari tænastu. Ættarliðið Y er sera virkið á netinum, og tey deila bæði góðar og vánaligar upplivingar við sítt netverk.
Nøkur eyðkenni fyri ættarliðið Y:
- 9 av 10 multitaska, tá ið tey hyggja at sjónvarpi
- 2 av 3 vilja heldur missa mappuna burtur enn telefonina
- 86% av ættarliðnum Y keypir á snildfonini
- 1% verður ávirkað av lýsingum
