Á Ferðavinnustevnuni 6. november verða ársins ferðavinnufólk og ársins átak heiðrað. Tú kanst vera við at avgera, hvør skal heiðrast
Árliga Ferðavinnustevnan verður fríggjadagin 6. november á Panorama á Hotel Hafnia. Á stevnuni verða heiðursbrøv handað Ársins ferðavinnufólki og Ársins átaki.
Tilnevningar til heiðursbrøvini kunnu saman við grundgeving sendast til industry@industry.fo í seinasta lagi týsdagin 6. oktober.
Í dómsnevndini sita Henny á Líknargøtu fyri Ferðavinnufelagið, Guðrið Højgaard fyri Visit Faroe Islands og Annika Lisberg fyri kunningarstovurnar.
Ársins ferðavinnufólk
Heiðurin verður latin einum, sum ger eitt stórt og týdningarmikið arbeiði og hevur beinleiðis samband við ferðafólk. Tað kann vera fólk, sum ger serligan mun í ferðavinnuni og sum við eldhuga og nærlagni er við til at geva ferðafólkum eina góða uppliving.
Ársins átak
Heiðurin verður latin teimum, sum hava dirvi og hugflog til at bróta upp úr nýggjum, og sum hava fingið eitt gott hugskot og gjørt tað til veruleika.
Einstaklingar, fyritøkur, stovnar ella felagsskapir kunnu vinna ársins átak. Treytin er, at tey í farna árinum hava gjørt okkurt nýhugsandi, sum er við til at menna útboðið og støðið á ferðavinnutænastum í Føroyum.
Á Ferðavinnustevnuni 2025 vórðu hesi heiðrað:
Fríðun Jacobsen – Ársins ferðavinnufólk
Við Tjarnir – Ársins átak
Poul Andrias Ziska – Ársins avrik
