Føroya Arbeiðsgevarafelag mælir limum til at fylgja tilmælunum frá myndugleikunum fyri at minka um smittuvandan.

Føroysku myndugleikarnir hava nú sett herd átøk í verk fyri almenna geiran fyri at basa covid-19. Virksemið í vinnuni heldur tó fram eftir vanligum treytum. Tað er umráðandi, at virksemið verður ávirkað sum minst, og steðgur ikki kemur í framleiðslu av vørum og tænastum til føroyska samfelagið og útheimin.

Støðan broytist kortini støðugt, og tí er neyðugt, at fyritøkur, við støðið í egnum viðurskiftum, gera ítøkiligar metingar av, hvussu virksemið kann skipast á bestan hátt fyri at minka um smittuvandan.

Somuleiðis er umráðandi at halda seg til tilmælini frá myndugleikunum.

Føroya Arbeiðsgevarafelag hevur samband við fakfeløg um íkomnu støðuna. Í ávísum fyritøkum er virksemið rakt av støðuni, og neyðugt er tí at gera tillaðingar á arbeiðsplássinum. Mælt verður til at leiðslurnar í fyritøkunum tosa við álitisfólk á staðnum um at leggja arbeiðið til rættis. Hetta kann t.d. gerast við, at starvsfólk halda feriu, avspáka ella finna aðrar loysnir í felag.

Vit hava verið í sambandi við Kommunufelagið um barnaansing komandi vikurnar. Sambært Kommunufelagnum verður barnaansing tøk fyri tey, ið hava tørv á ansing til og við 3. flokk. Hetta merkir, at starvsfólk í privatu vinnuni fáa framvegis børnini ansað á stovni. Kommunufelagið veitir nærri kunning um hetta.

Um ivamál eru um viðurskifti hjá starvsfólki, verður heitt á fyritøkur um at venda sær til Føroya Arbeiðsgevarafelag.