Seinasta árið hava bæði EFTA og Stórabretland gjørt nýggjar handilsavtalur við India. Sum skilst eru samráðingarnar millum ES og India væl á veg, og ein avtala kann verða liðug áðrenn ársskiftið

Fyri góðum ári síðani undirskrivaði EFTA – hvørs limalond eru Noreg, Ísland, Sveis og Liktinstein – eina fríhandilsavtalu við India, og í summar gjørdi Stórabretland somuleiðis eina víðfevnda avtalu við sama land. ES og India hava sett sær sum mál at fáa eina avtalu upp á pláss áðrenn ársenda 2025.

Hetta vísir, at áhugin fyri at menna handilssambond við India er stórur bæði í okkara nærumhvørvi og hjá okkara kappingarneytum, sum nú fáa betri marknaðaratgongd til ein stóran og vaksandi marknað. 

Tørvurin á handilsavtalum við India er stórur, tí India hevur sum heild ein høgan verjutoll á innflutningi. Eitt nú er tollurin á flestu fiskavørum oman fyri 30%, um eingin fríhandilsavtala er galdandi.

Føroyar standa uttanfyri
Í fjør var løgmaður á odda fyri handilsferð til India, har endamálið var at styrkja sambondini millum føroyskt vinnulív og indiskar myndugleikar og fyritøkur. 

Men nú, tá ið fleiri av okkara kappingarneytum fáa nógv betri marknaðaratgongd til indiska marknaðin, er greitt, at indiski marknaðurin verður neyvan veruliga áhugverdur fyri føroyskar útflytarar, fyrr enn Føroyar eisini fáa sína egnu fríhandilsavtalu.

Vinnuhúsið hevur í fleiri ár víst á, at Føroyar eru aftanfyri í altjóða handilssambondum, og gongdin bendir á, at munurin bara økist. Avtalan við India er eitt týðiligt dømi um hetta.