KT-felagið fegnast um frágreiðingina, sum fyri stuttum er latin Vakstrarforum at arbeiða víðari við. Frágreiðingin inniheldur 26 tilmælir til politisku skipanina, sum øll stuðla upp undir ætlaða vøksturin innan KT-vinnuna.
Í farnu viku skipaði KT-felagið fyri heimleiðistiltaki, har frágreiðingin um Kunningar- og samskiftistøkni (KST) varð løgd fram fyri limunum í felagnum. Tilmælini eru býtt í fýra høvuðsbólkar sum kallast:
- Grønur vøkstur
- Heilsu- og borgaravendar tænastur
- Útbúgving
- Yvirskipaðir karmar
KT-felagið hevur fyrr víst á, hvussu týdningarmikið tað er, at fáa meira útbúgvið fólk innan KT-økið. Her verður tosað um útbúgving til øll skúlastig frá fólkaskúla til hægri lesnaðir. Gleðilig tíðindi vóru í fjør, tá Setrið fekk eina játtan til KT-útbúgvingar, og at Setrið nú søkir eftir lærarakreftum til KT-útbúgvingar. Vónandi kann hetta vera byrjanin til, at tað verða settar væl fleiri útbúgvingar í gongd innan KT, samstundis sum KT-førleikamenning verður partur av fleiri av útbúgvingunum í fólkaskúlanum, miðnámi og á hægri lestrarútbúgvingum.
Øll 26 tilmælini í frágreiðingini hava sítt pláss og eru týðandi partur í eini vakstrarætlan, at røkka frá heimamarknaði til heimsmarknað. Fleiri útbúgvið KT-fólk er eitt tað týdningarmiklasta tilmælið í hesum sambandi. Í frágreiðingini verður m.a. víst á, at lond sum vit vanliga samanbera okkum við, hava umleið tvífalt so nógv KT-fólk í % av arbeiðsstyrkini, sum Føroyar. Harvið skal nógv gerast afturat innan útbúgvingarøkið fyri at fáa nøktandi arbeiðsstyrki. Nú er byrjan komin og KT-felagið setir sítt álit á, at Vakstrarforum fer at gera meira við hetta økið.
