Føroyskt handverk vakti ans á EuroSkills í Herning. Føroyski básurin var flottasti básurin yvirhøvur, siga fyriskipararnir
Í farnu viku hevði føroyska handverkaravinnan bás til EuroSkills, sum var í Herning. EuroSkills er ein EM-kapping millum handverkslærlingar, men føroyingar sleppa ikki at luttaka, tí vit ikki eru við í evroparáðnum.
Básurin skuldi kortini gera vart við føroyskt handverk og seta sjóneykuna á føroyskan limaskap. Og tað er kanska tað, sum skal til, tá ið mann skal biðja lova sær at fáa limaskap, soleiðis at føroyingar eisini sleppa at kappast í EuroSkills.
“Handverkslærlingar eru eitt stolt fólkaslag, og man vil fegin vísa, at man er dugnaligur til sítt yrki”, segði Marius Thomassen, ráðgevi í Vinnuhúsinum, sum samskipaði føroyska básin, í samrøðu við Kringvarp Føroya.
Í básinum stóð føroyskur bátur, sum John Høgnesen hevði smíðað til høvið. Og bakgrundina gjørdi Livar Nysted, sum málaði ein stóran málning av einum 10-mannafari.
“Vit fingu frænir av, at kongur var í høllini og hildu, at tað hevði verið stuttligt, um hann kom til básin hjá okkum. Eg helt, at eg mátti gera eitt pláss á málninginum, so hann kundi signera hann, so eg málaði eitt navnaskelti á bátin og vónaði, at kongur kom framvið, so hann kundi signera”, segði Livar í samrøðu við Kringvarp Føroya.
Og kongur kom. Hann var hugtikin, steðgaði á og játtaði at skriva navnið á bátinum, sum nú eitur Kongen.
Hoyr samrøðuna í Kringvarpi Føroya her.
Mynd: EuroSkills Herning 2025
