Longu í fjør vórðu treytirnar fyri at fáa graviloyvi at arbeiða í landsvegi ella við landsveg herdar og nú er tað eitt krav í loyvistreytunum, at tað altíð er minst ein á staðnum, har arbeitt verður, sum hevur luttikið í skeiðinum ”Vegurin sum arbeiðspláss”. Fyrr í ár hevur Tórshavnar Kommuna eisini boðað frá, at frá 1. januar 2010 verða somu treytir galdandi á vegum hjá kommununi.

Tað eru fleiri limir í feløgum, sum eru knýtt at Vinnuhúsinum, ið mangla hetta skeið, og hevur Vinnunám tí gjørt av, at bíleggja umrødda skeið frá Vej-EU, ið er ein stytting fyri Vejsektorens Efteruddannelse. Tað verða tí undirvísarar frá Vej-EU, ið fara at standa fyri skeiðnum, ið snýr seg um trygd í sambandi við vegarbeiðið. Bæði trygdina hjá tí, sum arbeiðir á vegnum ella við vegin og ferðslutrygdina sum heild í sambandi við vegarbeiði.

Skeiðið gevur eitt prógv, ið er galdandi í 5 ár, og sum eisini kann brúkast í sambandi við vegarbeiði í Danmark.

Skeiðið verður hildið í Havn, men endalig avgerð um júst hvar, er ikki tikin enn. Til ber tó at tekna seg til skeiðið longu nú, við at senda ein teldupost til Vinnunám á industry@industry.fo ella við at ringja til Vinnuhúsið á tlf. 309900.

Kostnaðurin fyri hvønn luttakara er kr. 5.000, um hesi arbeiða hjá feløgum, ið eru limir í Føroya Arbeiðsgevarafelag ella undirfeløgum tess. Hesi hava eisini framíhjárætt at luttaka á skeiðnum.

Kostnaðurin fyri onnur er kr. 6.500.

Íroknað prísin er matur, skeiðstilfar og prógv. Pláss er fyri 20 luttakarum á hvørjum skeiði.