Hugkveikjandi nýggj altjóðað ráðstevna sá dagsins ljós í í farnu viku. Tonik, sum ráðstevnan verður nevnd, varð skipað bæði við størri og minni básum, umframt við framløgum.
Føroyska KT-vinnan stendur í vøkstri og hetta var eyðsæð á Tonik ráðstevnuni. Ein ørgrynna av størri og smærri KT-fyritøkum vóru til staðar, har tær vístu fram skipanir og virksemi.
KT var eisini eitt av høvuðsátøkunum í Vakstrarforum. Tá varð serligur dentur lagdur á útflutning, har málsetningurin, um at KT-vinna skal vaksa úr 2,5% til 6% av BTÚ, varð orðaður. Hetta er avgjørt ein avbjóðing, sum føroyska KT-vinnan er før fyri at lyfta.
Fyri KT-felagið er leikluturin at savna KT-vinnuna. KT-felagið arbeiðir miðvíst fyri at betra karmarnar hjá KT-vinnuni og at fáa Føroyar í fremstu røð, tá tað snýr seg um KT. Felagið er bæði fyri tey, ið virka á føroyska marknaðinum, og tey, ið royna seg við útflutningi.
Á degnum varð boðað frá, at Tonik verður aftur komandi ár. Fyriskiparar eru Hugskoti, Uttanríkis- og Vinnumálaráðið, Vinnuframi, Framtak og Íverksetarahúsið.
