Í løtuni er uppskot um broytingar í Vinnufelagslógini og fylgibroytingar í øðrum lógum til hoyring.

Broytingarnar í vinnufelagslógunum eru umfatandi og tískil bjóðar Føroya Arbeiðsgevarafelag til kunnandi tiltak, har greitt verður frá týdninginum av hesum broytingum.

Sørin Pram Sørensen, løgfrøðiligur ráðgevi í Uttanríkis- og vinnumálaráðnum, hevur framløgu um lógarbroytingarnar sum fyriliggja, og luttakarar kunnu eisini seta spurningar.

Endamálið við broytingaruppskotunum er:

• At føroyskur vinnufelagarættur skal vera altjóða kappingarførur soleiðis, at tað ikki verða sett strangari krøv í Føroyum enn í øðrum londum
• At tað skal verða lættari at stovna vinnufyritøkur við avmarkaðari ábyrgd
• At minka umsitingarligu byrðarnar innan fyri vinnufelagsrættin við tí fyri eyga at einfaldgera vinnutreytirnar fyri føroysk kapitalfeløg
• At tað verður ein meira javnbjóðis umboðan av kvinnum og monnum í teimum størru føroysku vinnufyritøkunum
• At tryggja at Føroyar í mest møguligan mun kunnu lúka krøv í altjóða samstarvi um skattaviðurskifti, heruppií at skattamyndugleikarnir kunnu fáa innlit í eigaraupplýsingar viðvíkjandi handhavapartabrøvum, tá eigaraparturin er minni enn 5%
• At útvega heimild til at krevja, at alt viðkomandi skrivligt samskifti millum fyritøkur og myndugleikar fer fram talgilt
• At eggja fyritøkum og íleggjarum til at taka støðu til samfelagsábyrgd

Tiltakið er ókeypis og verður í Vinnuhúsinum á Óðinshædd 7, Tórshavn.

Til ber at síggja uppskot til lógarbroytingarnar her.

Tilmelding
Tilmelding fer fram við at senda teldupost til industry@industry.fo innan hósdagin 19. november 2015 kl. 12.00. Minst til at viðmerkja navn, fyritøku/stovn og teldupostbústað.