Hetta er heiti á fyrilestri, Páll Isholm fer at hava á Vinnudegnum 25. september.
Á Vinnudegnum 2009, sum verður um knappan mánaða, fer Páll Isholm, cand. mag. í norðurlendskum, samskifti og samfelagsfrøði, at halda ein fyrilestur undir heitinum “Lærdómur er lættur at bera – ella er hann?”
Í fyrilestrinum fer Páll á sín egna serliga hátt at koma inn á, hvørja støðu lærdómur hevur í føroyska samfelagnum, og kanska serliga hvussu føroyska vinnan og lærdómur virka saman.
Páll er leiðari á Føroya Handilsskúla á Kambsdali. Hann hevur eisini arbeitt sum teksthøvundur, verið fulltrúi innan almenna fyrisiting og eisini virka sum lærari. Afturat hesum størvum sínum hevur hann verið borgarstjóri og bygdarráðslimur í Gøtu kommunu og skrivari í Amnesty International.
Páll Isholm er millum annað eisini kendur frá sendingini Bart Út í útvarpinum, og tað verður helst serliga hesa síðuna av Páll, vit fara at síggja í Norðurlandahúsinum 25. september.
