Í farnu viku skipaði Føroya Handverksmeistarafelag fyri einum afturvendandi kunnandi tiltaki fyri næmingum á NámX. Tiltakið, ið hevur til endamáls at vísa á týdningin av læruplássi sum næsta stig í yrkisleiðini, savnaði uml. 100 næmingar, ið fingu eitt spennandi innlit í, hvat krevst fyri at sleppa í læru.
Tiltakið byrjaði við, at Magni á Lakjuni, vararektari á Glasi, bjóðaði vælkomin. Yrkislærd úr vinnunu greiddu frá, har tey løgdu dent á týdningin av at vísa áhuga og hava rætta hugburðina til arbeiði. Samstundis greiddu tey frá um teir mongu møguleikarnar, ið liggja fyri framman hjá teimum, sum velja læru sum sítt næsta stig. Eisini luttók Hjørdis Zachariasen, vegleiðari á Yrkisdeplinum, sum greiddi frá yrkisútbúgvingarskipanini.
Luttakararnir vóru:
- Lasse Lauritsen, gartnari, Hjálpirót
- Heri Kjerbo, HR-leiðari, Articon
- Dánjal Skorá, rør- og blikksmiður, Demich
- Heðin Hansen, bilsmiður, og Símun Benix Laursen, bilsmíðlærlingur, Reyni Service
- Ransin Djurhuus, málarameistari, RND
- Jens Mohr, maskinsmiður, og Tóki Blástein, maskinsmiðlærlingur, Mest
- Bárður Einarson Hansen, elektrikaralærlingur, LM Electric
- Hjørdis Zachariasen, vegleiðari, Yrkisdepilin
Næmingarnir fingu møguleika at lurta eftir framløgum frá tveimum ymiskum handverkarum. Eftir hetta varð ein óformellur partur av tiltakinum, har handverkararnir vóru til staðar, so næmingarnir kundu seta teirra egnu spurningar og fáa nærri innlit í, hvat arbeiðið og lærutíðin krevur. Hetta vísti seg at vera serstakliga væl móttikið, tí næmingarnir vóru forvitnir og vístu stóran áhuga.
Hvat krevst fyri at sleppa í læru?
Ein av niðurstøðunum frá tiltakinum er, at vegurin til eitt lærupláss krevur bæði ágrýtni og opinleika fyri at læra nýtt. Handverkararnir greiddu frá, at sum lærlingur er tað umráðandi at duga at vísa álitisvekjandi hugburð, arbeiðsgleði og skil fyri góðum samstarvi.
Eisini varð dentur lagdur á, at lærupláss ikki bert er ein byrjan – tað er eisini ein leið, sum opnar hurðar til spennandi arbeiðs- og útbúgvingarmøguleikar bæði her heima og uttanlands.
Tiltakið er eitt dømi um, hvussu NámX og Føroya Handverksmeistarafelag í tøttum samstarvi arbeiða fyri at tryggja, at næmingar fáa neyðugu vitanina til at taka rættar avgerðir um framtíðina. Tað vísir eisini týdningin av tí nátúrliga sambandi millum skúla og vinnu, sum er grundleggjandi fyri at styrkja komandi starvsfólk á arbeiðsmarknaðinum.
Framhaldandi stuðul til ung
Við eini breiðari luttøku frá bæði næmingum og handverkarum er hetta tiltakið vorðið eitt fast afturvendandi tiltak, ið hvørt ár gevur næmingum nýtt innlit og nýggjan íblástur. Handverksmeistarafelagið heldur áfram at eggja næmingum til at síggja lærupláss sum eitt tryggan og spennandi vegamót í teirra lívsleið.
