Danmark lækkar inntøkumarkið fyri arbeiðs- og uppihaldsloyvi úr 500.000 til 300.000 kr. fyri at møta vaksandi tørvinum á arbeiðsmegi
Markið fyri, hvussu nógv eitt útlendskt starvsfólk skal forvinna fyri at kunna fáa arbeiðs- og uppihaldsloyvi í Danmark, verður nú lækkað. Nýggja skipanin fevnir um 16 ymisk lond uttan fyri ES.
Semja er gjørd millum danskar myndugleikar, fakfeløg og arbeiðsgevarafeløg um at lækka kravdu ársinntøkuna hjá útlendskum starvsfólkum úr góðum 500.000 kr. niður í 300.000 kr. Í hesum upphæddum verður roknað løn og feriuløn.
Lækkingin er fyribils galdandi fyri 16 útvald triðjalond, sum tilsamans fevna um umleið helvtina av fólkatalinum í heiminum. Orsøkin er tann stóri starvsfólkatørvurin, har betri atgongd til at seta útlendsk starvsfólk í starv er neyðug fyri at tryggja framhaldandi búskaparvøkstur.
Tað eru einans undangóðkendir arbeiðsgevarar, ið eru fevndir av kollektivum sáttmála, sum kunnu brúka skipanina við lækkaðum inntøkumarki. Eisini eru onnur krøv, sum arbeiðsgevarin skal lúka fyri at kunnu brúka hesa skipanina.
Hesi tiltøk snúgva seg um at fyribyrgja sosialari dumping. Millum annað má arbeiðsgevarin ikki seinastu tvey árini hava fingið bót fyri at gjalda útlendskum starvsfólki ov lága løn og ikki vera revsaður meira enn tvær ferðir fyri brot á útlendingalógina.
Danski ES-limaskapurin hevur við sær, at starvsfólk úr øðrum ES-londum frítt kunnu flyta til Danmarkar at arbeiða. Sama er galdandi fyri starvsfólk úr øðrum norðurlondum.
Eisini eru ymiskar Fast Track-skipanir fyri at seta starvsfólk úr triðjalondum í starv, men við nýggju skipanini verður lættari at fáa arbeiðs- og uppihaldsloyvi í Danmark til ein breiðari hóp av starvsfólkum.
Kelda: Beskæftigelsesministeriet
