Arbeiðsgevarar í Danmark hava verið afturhaldandi í teimum lokalu lønarsamráðingunum, sum hava verið eftir yvirskipaðu semjuna, sum fakfeløg og arbeiðsgevarar gjørdu í vár.
Nýggj tøl frá Dansk Industri vísa, at fyrstu úrslitini av lokalu lønarsamráðingunum í ídnaðinum merkja, at starvsfólk uppliva eina afturgongd í lønarhækkingunum í prosentum.
Til dømis eru lønarhækkingarnar hjá vanligum starvsmonnum lækkaðar úr 2,2 prosentum niður í 1,64 prosent. Á henda hátt uppliva flestu løntakarar, at reallønin lækkar. Hetta skrivar Børsen í dag.
Sambært Steen Nielsen, varastjóra í Dansk Industri, er orsøkin til lágu lønarhækkingarnar, at fyritøkurnar framvegis eru í kreppu.
- Lágu lønarhækkingarnar, sum vit hava sæð undir kreppuni, halda fram í 2012, tí at fyritøkurnar framvegis hava tørv á at ansa eftir kostnaðarstøðinum og at tillaga tað. Kreppan og lønarstøðið her heima hava merkt, at kostnaðarstøðið er hækkað, sigur Steen Nielsen.
