19. september verður Norðurlandahúsið aftur karmur um spennandi fyrilestrar og samrøður á Vinnudegnum 2025
Nú ber til hjá limum í Føroya Arbeiðsgevarafelag og undirfeløgum tess at melda seg til Vinnudagin. Limir, sum melda til áðrenn 26. august, fáa luttøkuna til ein serligan prís. Týsdagin 26. august verður opið fyri øllum at melda seg til.
Tað er Føroya Arbeiðsgevarafelag, sum skipar fyri Vinnudegnum, sum eins og undanfarin ár verður hildin í Norðurlandahúsinum. Veitslan verður hesaferð hildin í veitsluhølunum hjá Dansifrøi í Gundadali.
Vinnulívsfólk og onnur áhugað fyri vinnu fáa møguleika at kunna seg um aktuell evni, at netverka og hittast til sosiala samveru. Ársins Virki og Vinnuátakið verða sjálvsagt eisini kosin og heiðrað á ársins Vinnudegi.
At hoyra á Vinnudegnum 2025 verða millum annað:
Sviin Thomas Erikson er kendur fyri sína røð av bókum “Surrounded by..”; so sum Surrounded by Idiots. Thomas er víðakendur atferðarserfrøðingur og rithøvundur, og sum røðari á Vinnudegnum fer hann at geva amboð til, hvussu vit kunnu skilja tey, sum vit ikki skilja.
Danin Brian Sørensen er stovnari av kenda orkudrykkinum Cult Energy, sum hann seinni seldi til Royal Unibrew. Brian er íverkseti og er í dag medeigari í fyritøkuni PadelPadel. Á Vinnudegnum fer Brian at taka okkum við á hansara ferð sum íverkseti – frá at hava eitt hugskot og til at seta tað í verk.
Íslendska Vera Antonsdottir er stjóri í Grósku, sum er miðdepilin í Íslandi fyri vøkstri í nýskapan, har samstarv millum vinnu og universitet er í hásæti í øllum frá tøkni, gransking, menning og nýskapan. Vera fer at vísa á ítøkilig dømi, hvussu arbeitt verður í Grósku – frá at hava eitt hugskot og fram til konkretar íløguætlanum.
Ben Arabo, stjóri í Framtak, fer at greiða frá, hvussu vit í einum lítlum samfelag kunnu gera Føroyar meira spennandi fyri bæði innlendis og útlendskar íløgur.
Ben fer at hugleiða um, hvussu tað ber til at flyta seg frá fyrstu tonkunum um eitt hugskot til veruligar íløguætlanir, og hvussu vit í einum lítlum samfelag skilagott kunnu tillaga eina tilgongd til okkara stødd og marknað.
Eisini verður ein spennandi røð við styttri fyrilestrum undir heitinum “Hvussu lofta vit hugskotum”.
Her fara fýra føroyskar fyritøkur at greiða frá, hvussu tær lofta hugskotum og arbeiða við nýskapan í fyritøkuni.
Tað verður Kjartan Hansen, sum fer at leiða dagin sum orðstýrari í Norðurlandahúsinum í ár.
Týsdagin 26. august verður opið fyri øllum at melda til Vinnudagin 2025.
Limaavsláttur
Inntil 25. august á midnátt er avslátturin fyri limir í Føroya Arbeiðsgevarafelag og undirfeløgum tess 30%, so kostnaðurin er ávíkavist 2.940 kr. við veitslu og 2.100 kr. uttan veitslu.
Frá 26. august verður avslátturin 20%, so kostnaðurin er ávíkavist 3.360 kr. við veitslu og 2.400 kr. uttan veitslu.
Vanligur prísur er 4.200 kr. við veitslu og 3.000 kr. uttan veitslu.
