Føroyska vinnan merkir nú av álvara avleiðingarnar av fíggjarkreppuni. Møguleikarnir at fáa atgongd til fígging eru avmarkaðir, og vinnufyritøkur merkja, at handilsambondini ganga munandi trekari. At fígging er vorðin dýrari og sera torfør at fáa atgongd til, fær nú álvarsligar fylgjur fyri vinnuna og føroyska búskapin næstu tíðina.

Uttanlands henda sera stórar broytingar í fíggjarheiminum. Seinastu vikurnar hava útflutningsfyritøkurnar merkt, at tær missa tryggingar av keyparum uttanlands. Hetta er sera álvarsligt, tí rakstrarfíggingin hjá útflutningsfyritøkunum er treytað av, at teirra keyparar hava tryggingar. Orsøkin til, at keyparar missa sína trygging, er, at feløgini, sum endurtryggja tryggingarnar, eru komin í fíggjarligar trupulleikar, umframt at fíggjarmarknaðirnir yvirhøvur virka illa.

At selja vørur kontant er ein leið at ganga, men føroyskar vørur gerast minni kappingarførar, tá útflytarar í øðrum londum kunnu bjóða betri gjaldstreytir, tí teirra lond kunnu veita útflutningstrygd til útflytararnar.

Skipanir við útflutningsfígging finnast í fleiri londum. Norska skipanin við útflutningsfígging er háttað soleiðis, at til ber hjá norskum fyritøkum at søkja um at fáa keyparar úr øðrum londum tryggjaðar gjøgnum útflutningsfíggingarskipanina. Nakað líknandi skipan hava danskar fyritøkur. Útflutningsfíggingarskipanirnar veita bæði tryggingar og fígging til útflutningsfyritøkur.

Í Føroyum er eingin slík skipan tøk til útflutningsvinnuna. Tað merkir, at føroyskar fyritøkur í hesum døgum mugu selja kontant, meðan kappingarneytarnir úr grannalondunum hava møguleikan at fáa tryggingar í nationalum útflutningsfíggingarskipanum. Hetta er við til at avlaga kappingina millum fyritøkur úr ymsum londum. Fyritøkur, sum selja á sama marknað og mangan til somu keyparar.

Í Føroyum er heldur eingin skipan við fyritøkuveð (virksomhedspant). Slíkar skipanir geva fíggjarstovnum betri trygdir. Fyritøkur, sum hava stórar goymslur njóta serliga gott av slíkari skipan. Ein skipan við fyritøkuveð gevur virkjum betri møguleika at veita trygd í m.a. vørugoymslum og ágóðum hjá keyparum. Skipanir við fyritøkuveð eru galdandi í flestu grannalondum okkara, men ikki í Føroyum.

Føroysk vinna manglar karmar, sum eru sjálvsagdir í londunum kring okkum. Hetta er serstakliga álvarsligt nú, tað er so torført at fáa fígging til dagliga virksemið. Vanligar marknaðarskipanir við trygging av keyparum í útlandinum virka ikki orsaka av fíggjarkreppuni, og skipanin við fyritøkuveð, sum kundi verða við til at hjálpt um fíggingarmøguleikarnar hjá vinnuni, er ikki galdandi her hjá okkum. Føroya Arbeiðsgevarafelag metir tað hava alstóran týdning, at umboð fyri vinnu og politisku skipanina beinanvegin seta seg at viðgera hesi mál og koma við uppskotum um, hvat til ber at gera á hesum økinum, fyri at fáa loyst upp fyri nøkrum av teimum trupulleikum, vit hava í løtuni.