Miðnámsskúlanæmingar frá Glasi vístu stóran áhuga fyri avbjóðingum og møguleikum í privatu vinnuni

Tað er av stórum týdningi, at ung sum eldri fáa innlit í vinnulívið, og samstundis leggja sær í geyma avbjóðingarnar og møguleikarnar, sum privata vinnan stendur fyri. Fríggjadagin í farnu viku vitjaðu 40 miðnámsskúlanæmingar frá Búskaparbreytini á Glasi í Vinnuhúsinum.

Niels Winther, stjóri, greiddi frá virkseminum í Vinnuhúsinum og kjarnini, sum er at arbeiða fyri, at føroyskt vinnulív hevur bestu møguleikarnar fyri at kappast, mennast og framleiða varandi virði.

Miðnámsskúlanæmingarnir fingu innlit í fýra avbjóðingar, sum privata vinnan stendur fyri; nevniliga starvsfólkatørv, hækkandi kostnað at reka vinnu, marknaðaratgongd og burðardygga framleiðslu.

Harumframt fingu tey innlit í altjóða handil, útflutning og búskap.

At enda greiddi Alvi Hjelm, ráðgevi, frá um føroyska arbeiðsmarknaðin. Hann greiddi millum annað frá, hvussu arbeiðsmarknaðurin er skipaður, samstundis sum hann gav miðnámsskúlanæmingunum innlit í sáttmálasamráðingar.

Í Vinnuhúsinum fegnast vit um, at miðnámsskúlanæmingar geva sær stundir at vitja okkum við at vísa stóran áhuga fyri at hoyra meira um privata arbeiðsmarknaðin. Vit gleða okkum at taka ímóti fleiri næmingum í framtíðini.