Minningarorð um Oddfríð Gregersen

12. august. 2020 | Tíðindi | Almenn tíðindi

8. august 2020 andaðist Oddfríður Gregersen, 92 ára gamal. Vit í Føroya Arbeiðsgevarafelag minnast Oddfríð við takksemi.

Nógv avrik eru eftir Oddfríð Gregersen. Hann var skipari og seinni reiðari og stjóri á Fiskavirkinum í Gøtu og var harumframt við til at leggja lunnar undir alivirksemið hjá Luna. Tað er tó í sambandi við hansara stóra leiklut sum nevndarlimur og formaður í Føroya Arbeiðsgevarafelag, at vit ynskja at minnast hann.

Oddfríður var valdur í nevndina í Føroya Arbeiðsgevarafelag í 1968. Tey fyrstu 16 árini var hann næstformaður í felagnum, og í 1984 tók hann við sum formaður. Oddfríður røkti formanssessin til hann legði frá sær í 1993. Í samfull 25 ár var Oddfríður sostatt nevndarlimur í felagnum, har hann umboðaði áhugamálini hjá føroyskum fyritøkum og arbeiðsgevarum.

Oddfríður var ein maður, sum setti síni spor, har hann var. Sum formaður í Føroya Arbeiðsgevarafelag var hann sjónligur, og hvør minnist ikki Oddfríð frá teimum mongu sáttmálasamráðingunum, sum hann stóð fyri vegna felagið. Tíðarskeiðið, tá Oddfríður var formaður í Føroya Arbeiðsgevarafelag, var eisini eitt tíðarskeið, sum til tíðir kravdi nógv orsakað av teimum mongu ósemjunum, sum tá vóru á arbeiðsmarknaðinum.

Nevndin í Føroya Arbeiðsgevarafelag vil nýta høvi at takka Oddfríði Gregersen fyri hansara stóra íkast til felagsarbeiðið í Arbeiðsgevarafelagnum, hetta er eingin sjálvfylgja!

Takk fyri.

Annað á breddanum

  1. Tørvur á broytingum í fíggjarpolitiska regluverkinum

    Føroya Arbeiðsgevarafelag fegnast um, at uppskotið til fíggjarpolitiskt regluverk loksins er sent til hoyringar. Samstundis vísir felagið á, at fleiri broytingar eru neyðugar, um regluverkið skal røkka endamálinum

    21. oktober. 2025
    Vinnuhusid 4
  2. Nýggj og kend andlit í Ferðavinnufelagnum

    Henny á Líknargøtu heldur fram sum forkvinna í Ferðavinnufelagnum, meðan Halda Juul Olsen og Tróndur Kollsker eru nýggj í nevndini.

    21. oktober. 2025 | Ferðavinna
    Ferðavinnufelagið Nevnd 2025
  3. Føroya Arbeiðsgevarafelag og Føroysk Miðlafólk handað krøv

    Mánadagin 21. oktober byrjaðu sáttmálasamráðingarnar millum Føroya Arbeiðsgevarafelag og Føroysk, tá ið partarnir handaðu hvørjum øðrum krøv

    21. oktober. 2025 | Sáttmálasamráðingar
    Miðlar