Burturkast 1

Netverkstiltak um burturkast og ringbúskap

26. august. 2024 | Tíðindi | Almenn tíðindi

Tann 11. september skipar Føroya Arbeiðsgevarafelag fyri innleiðandi netverkstiltaki um burturkast og ringbúskap. Tiltakið er ætlað fyritøkum, ið vilja gerast partur av netverki, ið arbeiðir við burðardygd

Føroya Arbeiðsgevarafelag fer nú at skipa netverk innan burðardygd, bæði fyri fyritøkur, ið longu eru farnar í gongd, men eisini fyri tær, sum eru nýggjar á økinum. Á innleiðandi netverkstiltaki 11. september verður kunnað meiri um, hvussu netverkini verða skipað og hvørji krøv eru til luttøku.

Fyrsta evni á skrá er burturkast
Føroyskar vinnufyritøkur eiga meir enn helvtina av samlaða føroyska burturkastinum. Skal størri partur av tilfarinum haldast í ringrás, er neyðugt at burturkastøkið fær hægri politiska raðfesting. Vinnufyritøkur mugu hava fleiri møguleikar til endurvinning og eisini má innsavningin av burturkasti blíva meiri fjølbroytt. Ein fyritreyt fyri menning er eisini, at fyritøkur fáa til vega góðskutryggjað hagtøl, soleiðis at til ber at seta sær mál.

Á innleiðandi netverkstiltakinum verða tríggjar áhugaverdar framløgur um burturkast og ringbúskap:

  • Umhvørvisstovan greiðir frá nýggju burturkastkunngerðini
  • Stena Recycling Danmark greiðir frá, hvussu fyritøkur kunnu leggja arbeiðið við burturkasti til rættis
  • IRF og KB greiða frá, hvørjar avbjóðingar eru við vinnuburturkasti og vísa á møguligar loysnir

Netverkstiltakið verður mikudagin 11. september á Hotel Runavík kl 9:00-12:00. Eftir døgurða ber til at vitja IRF á Hagaleiti og síggja hvussu burturkast verður handfarið.

Allir beinleiðis og óbeinleiðis limir í Føroya arbeiðsgevarafelag kunnu luttaka. Tiltakið er ókeypis.

Melda til luttøku í seinasta lagi hósdagin 5. september við at senda ein teldupost til: industry@industry.fo

Les eisini: Burðardygt Vinnulív gerst partur av Føroya Arbeiðsgevarafelagi

Annað á breddanum

  1. Finnland og Danmark lækka partafelagsskattin

    Finnland lækkar partafelagsskattin til 18% við ársskiftið, og Danmark ætlar at lækka hann til 19% í stigum

    17. november. 2026 | Almenn tíðindi
    Finland Denmark Flags
  2. Enn eitt avgjald á føroyskar arbeiðsgevarar – hesaferð fyri lønarflytingar

    Ætlanin er, at føroyskir arbeiðsgevarar framyvir skulu gjalda eitt avgjald fyri hvørja lønarflyting. Føroya Arbeiðsgevarafelag mælir frá at samtykkja avgjaldið

    17. november. 2026 | Arbeiðsmarknaður
    Vinnuhusid 4
  3. Frídagar um jólini – hvat er galdandi?

    Fá yvirlit yvir frídagar um jólini og nýggjárið, og hvussu arbeiði hesar dagar verður lønt

    17. november. 2026 | Arbeiðsmarknaður
    Frídagar Um Jólini 26