Hósdagin og fríggjadagin í farnu viku var nevndin í Føroya Arbeiðsgevarafelag í Brússel og kunnaði seg um EFTA, EBS og ES. Henda kunningarferð er komin í lag, ásannandi at Føroya tilknýtið til Evropa verður eitt mál til umrøðu komandi tíðina.

Vitjað varð á EFTA-skrivstovuni í Brússel, har nevndin varð kunnað um EFTA sum felagsskap, um arbeiðið hjá EFTA, og hvørjar møguleikar Føroyar hava at gerast partur av EFTA. Somuleiðis varð vitjað á føroysku sendistovuni í Brússel og á norsku og íslendsku sendistovunum.

Norsku og íslendsku arbeiðsgevarafeløgini eru eisini umboðaði í Brússel. Bæði feløgini eru limur í BuisnessEurope, sum er evropiska meginfelagið fyri arbeiðsgevarafeløg. Áhugavert var at hoyra um, hvørja støðu norska og íslendska arbeiðsgevarafelagið hava til teirra tilknýtið til ES og um, á hvønn hátt tey meta seg hava ávirkan á tey mál, sum verða viðgjørd í ES høpi.

Føroya Arbeiðsgevarafelag fer í næstum at taka samanum vitjanina í Brússel og taka støðu til, á hvønn hátt felagið skal arbeiða við hesum framyvir.