Eftirspurningurin á heimligu marknaðunum heldur gongd í virkseminum, samstundis sum ferða- og útflutningsvinnurnar bíða eftir, at heimurin fer at lata uppaftur.
Sambært nýggjastu lønarhagtølunum frá Hagstovu Føroya vóru samlaðu lønargjaldingarnar 2.569 mió. kr. fyrsta ársfjórðing í ár. Sama ársfjórðing í fjør vóru samlaðu lønargjaldingarnar 2.550 mió. kr. Samlaðu lønargjaldingarnar vóru sostatt næstan 20 mió. kr. hægri fyrsta ársfjórðing í ár samanbornar við fyrsta ársfjórðing í fjør.
Tað er tó ymiskt, hvussu lønargongdin í ymsu geirunum í samfelagsbúskapinum hevur verið higartil í ár samanborin við somu tíð í fjør.
Í almenna tænastugeiranum eru lønargjaldingarnar hækkaðar næstan 69 mió. kr. Í heimligu handils- og tænastuvinnunum eru lønargjaldingarnar hækkaðar næstan 30 mió. kr. Í fiski- og tilfeingisvinnunum eru lønargjaldingarnar harafturímóti lækkaðar góðar 71 mió. kr., og í byggi- og tilvirkingarvinnunum góðar 7 mió. kr.
Tað eru sostatt almennu tænasturnar og eftirspurningurin eftir vørum og tænastum annars á heimliga marknaðinum, sum standa aftanfyri vøksturin í samlaðu lønargjaldingunum higartil í ár.
Fiskivinnan og aðrar vinnur, sum fyri størsta partin liva av eftirspurningi uttanífrá, hava havt eina afturgongd í lønargjaldingunum á 15%, og í byggivinnunum hevur afturgongdin í lønargjaldingunum verið 2% fyrsta ársfjórðing í ár samanborin við sama ársfjórðing í fjør.
Lønarhagtølini og onnur hagtøl fyri fyrsta ársfjórðing í ár staðfesta fyri stóran part gongdina í føroyska samfelagsbúskapinum hetta seinasta árið, har ein partur av pengunum, ið vórðu settir av at ferðast fyri, verða brúktir á heimliga marknaðinum, tí koronatiltøkini forða fólki at ferðast um landamørkini.
Fyrsta ársfjórðing í ár fóru 20.350 ferðafólk um flogvøllin. Hetta eru góð 64% færri ferðafólk enn sama ársfjórðing í fjør, og næstan 15.000 færri ferðafólk enn fyrsta ársfjórðing fyri 10 árum síðan, tá tað fóru góð 35.000 ferðafólk um flogvøllin í Vágunum.
Fyrsta ársfjórðing í ár vórðu skrásett 756 nýggj akfør á Akstovuni, samanborið við 640 akfør í fjør. Hetta svarar til ein vøkstur á góð 18%. Ný skrásettu akførini fyrsta ársfjórðing í ár vóru eisini fleiri enn í 2019, tá 700 nýggj akfør vórðu skrásett fyrsta ársfjórðing.
